【開心速遞】池子孝被分手後頹廢不堪　熊心如零傷心自覺冷血

真正愛一個人是否不會介意對方的學歷？如果好似無綫處境劇《愛‧回家之開心速遞》入面的池子孝 （阮政峰　飾） 同熊心如（蘇韻姿　飾）咁樣，一個是小學生學歷，一個是雙碩士仲準備讀博士，愛情又可會跨越到呢個極大的差距呢？昨晚播出的一集劇情講，子孝希望努力去考DSE，目標係可以讀到大學以拉近他和心如之間的距離，心如為了想子孝可以專心讀書，決心要同子孝分手，令子孝大受打擊。

雖然子孝一度頹廢不堪，但他為了令心如回心轉意，終於重新振作，發奮讀書。不過心如卻始終不為所動，仲異常冷漠咁同子孝講自己分手後連半點唔開心的感覺都無。其實學歷的懸殊真係會導致兩個人的價值觀同想法好唔同，所以就算心如覺得同子孝唔係她的理想對象，亦無可厚非。但係愛可以包容一切，或者學歷的差距也只是藉口而已，唔愛先係死因，試問如果愛對方的話，分手又怎會不難過？現在的心如反而覺得分手後更加寫意自在，就已經證明了她不再愛子孝，甚至係從來都無愛過？

觀眾同網民睇完呢集的反應就比較兩極，有人就話好唔捨得心如同子孝分手，話希望他們之後會復合，但亦有網民覺得既然唔愛不如早分早着，無謂浪費大家時間，以心如的條件可以搵到更好的對象，同子孝兩個學歷差咁遠真係好唔襯。蘇韻姿於她的ig貼了心如同子孝的合照並留言表示：「呢個地方就見證住我哋嘅開始...同埋結束。」而阮政峰亦於他的ig貼了兩人的合照留言：「完結了」。到底兩人可有機會復合呢？

而蘇韻姿接受訪問時就剖白心如的想法說：「佢真心想為阿孝嘅前途好，因為佢認為讀得多書就係好，心如唔係睇唔起阿孝嘅學歷，只係想阿孝要爭氣啲，為自己嘅目標去努力多啲，但係阿孝Show唔到畀心如睇。」她坦言學歷重要卻不是一切，最重要是兩個人啱key。