【天命】TVB改造歷史美化「貪官」和珅　陳展鵬：電視劇要有創作

和珅大人陳展鵬孖著劇中演員來到九龍灣宣傳，大玩遊戲又與民同樂，哄到一班街坊見牙唔見眼，而和大人的人氣亦夠旺，個個爭著向他要禮物同影相，果真魅力沒法檔啊！

過去有唔少人都做過和珅角色，令人最難以忘記的就非內地演員王剛莫屬，這一點他都知道，在拍之前他都有睇一些歷史事蹟，不過今次的和珅是與眾不同，陳展鵬就表示：「因為王剛老師太深入民心，不過呢套劇的和珅玩法唔同，所以他們（編審﹑監製）給了好多提議同想法我。」

而眾所周知歷史上的和珅是「貪得無厭」，不過在《天命》中似乎將和珅太美化，好多時候會令人覺得他是一位英雄，對於這一點似乎同真實歷史有好大出入，對此陳展鵬就覺得：「電視應該有創作的能力，如果再拍貪的，我想題材都好難做。同埋好多觀眾都會知道其實和珅是一代貪官，他在這個時代（乾隆）做到功高要職，我們只希望他立體一些，因為好多事觀眾可能不知道，今次透過劇集去探討自己所要的知識都幾好。」

知道歷史的朋友都知道，和珅的原型是一位聰明了得又靚仔的人，對此陳展鵬做得這個角色，問到監製是否睇中他這一點，他就堅持表示：「唔覺得，監製給了一個好大機會我，因為我一路以來好想拍多一點歷史人物，所以和珅是一位好傳奇的人物，拍呢部劇都相當開心。」

陳展鵬好演技就大家都知道，在最新一集中因為弟弟和琳受嘉慶折磨關係，令他傷心不已，兩眼通紅哽咽睇到觀眾超心痛，對此他亦表示拍呢場內心戲好累：「拍感情其實好累，因為我基本上沒有滴眼藥水，因為投入了角色好似是真一樣，情感自然會出來。」睇嚟能夠問鼎視帝寶座果然實至名歸。