【天命】嘉慶被嫌得一個表情　譚俊彥：睇多啲就有其他表情

無綫清裝劇《天命》一班演員來到九龍灣宣傳，嘉慶譚俊彥﹑皇貴妃李施嬅﹑諴妃陳自瑤﹑和珅陳展鵬等人分成兩隊大玩遊戲，笑到一班街坊見牙唔見眼，最後難以分出勝負打成平手大家更齊齊與民同樂，大派禮物大小朋友都爭著要。

有睇《天命》的都知道， 譚俊彥飾演的嘉慶無時無刻都擺出一幅兇神惡煞的樣，令唔少人睇到都心驚驚。不過似乎每次都擺出呢個樣，將「兇」的一面演得過火，被網友質疑好似有躁狂症演技冇咩變化，對此譚俊彥就唔係咁睇：「角色設計嘉慶是有躁狂症，睇多啲就有其他表情。當然有人接受有人不接受，這個是我在TVB第一部劇，當然同大家的節奏同大家的表演方法有一點適應期，隨著28日一日一日推進，這個角色會愈來愈平和的。大家真係要睇。」

作為在無綫第一部劇，譚俊彥亦都知道觀眾需要適應，他就叫觀眾期待他之後將播出的劇集會帶來與眾不同面貌：「第一次在TVB拍劇，對著一些新對手新環境好多嘢都未適應，好多謝大家給意見。之後有幾套劇會播出，我相信有唔同表演唔同角色的感覺給到觀眾。」

正正因為該劇以歷史人物為主，而《天命》似乎將和珅美化了，好多時候其實都同史實不符，問到譚俊彥怕唔怕該劇教錯觀眾歷史，他就認為：「歷史是如何就冇人知，因為歷史留給我們只是一本書，記錄一些事到底是如何亦都冇人知，好似包青天咁大家印象是肥有鬍鬚，其實真正的包青天是又矮又瘦，如果所有事都根據歷史可能唔好睇。」對於今次處女作他只給自己6﹑7分（10分滿分），因為仲有好多進步空間的，他亦保證之後的劇照有唔同層次。

眼見身為人夫人爸的他原來都好有才華，今早就在個人社交網站上貼一段玩結他片，唔講唔知原來他已經玩了二十多年：「現在拍緊18年後好陰沉，好多事唔開心所以用音樂放鬆自己。」而他最喜歡原來是重金屬音樂，望有機會給觀眾多睇自己呢一面。