【後生仔傾吓偈】馮盈盈成日做錯事傷害男友　麥明詩：錯在拍咀戲

最新一集《後生仔傾吓偈》以「身邊總有個神婆」為主題，並搵來塔羅牌專家Sandy為FYY馮盈盈同麥明詩預測姻緣。向來都唔避諱談及戀情嘅馮盈盈一嚟就已經係「會唔會同男友開花結果」，之不過，當佢見到自己抽出嘅三張牌分別係命運的嘲弄、能量同傷心欲絕時，真係差啲暈。

塔羅牌專家Sandy指「命運的嘲弄」正係馮盈盈對男友的狀況，並解釋：「大家都好似唔喺right timing之上」馮盈盈聽完即時話好準，並指明天難得放假，可惜醫生男友要on call。至於「能量」一牌，就係男友對馮盈盈的看法，塔羅牌專家Sandy醫生男友無論有什麼都想與馮盈盈分享，並且不追求回應，馮盈盈頻頻點頭表示認同，亦透露與男友經常有傾唔完的話題。咁到底點解會出現「傷心欲絕」的將來呢？塔羅牌專家Sandy就指出「現階段係唔得，原因係你成日都會做錯事。」麥明詩聽完就多口話馮盈盈最錯就係拍劇同對手有咀戲，6號亦接著問:「呢啲其實會唔會嬲?」馮盈盈好直接咁話:「緊係嬲啦，嬲到阿媽都唔認得！」

塔羅牌專家Sandy之後又指出馮盈盈會不時做出傷害感情的事，例如係發脾氣，結果又中晒！馮盈盈笑言自己日日都發脾氣，並指係因為工作太累所致。「寶寶（男友）都好耐性咁陪我，第二日會好冷靜咁同我傾返，又話我份工唔係打一兩年就完，叫我快要啲適應……」對於呢次的占卜，馮盈盈真心表示好準，更提議收工後同塔羅牌專家Sandy食餐飯，似乎對於同醫生男友的將來真係好擔心。