林夏薇回應遭無綫官網「下架」：生B係我計劃

入行8年的林夏薇，早前在無綫劇集《逆緣》飾演中日混血兒庄司晨表現大獲好評，很多觀眾都很期待她在下一套劇集《十二傳說》的演出，不過最近卻傳出薇薇離巢消息，早前記者更發現，其個人簡介於TVB官方網站中的女藝員名單上「被消失」，令一班常以電視汁撈飯的人震驚！而薇薇較早時間接受《香港01》訪問時，就指自己與記者一樣的是剛剛知道自己「被下架」，令事情更加撲朔迷離。

就在回應報道刊登後數小時，薇薇再次接受《香港01》記者訪問，直言自己終於搞清楚來龍去脈：「我經理人啱啱通知咗我約滿嘅事，因為最近都有好多工作進行緊，嚟緊又有新劇宣傳，所以都冇為意約滿嘅時間！」她坦言最近重心都放在生意上，不單止忙於為旗下飲食集團天后分店開張的事籌謀，亦為未來新投資項目上費神：「我同TVB合作無間亦好好感情，一直有傾工作，所以真係冇為意份約嘅期限，我同公司都以為仲有約！」

整件事乍聽薇薇貴人事忙「懵懵哋」，惟既成事實，她補充指，就算與無綫完約，也並不代表自己離巢：「會再合作嘅，公司都錫我，珍姐（曾勵珍）係我伯樂，畀咗好多機會我，我好感激佢，樂小姐（樂易玲）都係，大家一直有商量有傾合作。（會轉部頭約？）TVB係大家庭，我對佢好有感情，之後咩合約都係一種形式啫。」

薇薇之前坦言與老公一直都有造人計劃，但至今仍未成事，問現時是否真正實行大計？薇薇坦言未來會再心神放在家庭上：「生B係我哋而家嘅家庭計劃其中一步，希望之後可以花多啲時間喺家庭同生意上，再養足精神、調理好身體再重新出發。」至於老公怎看她的決定？薇薇坦言：「佢一路以嚟都好支持我嘅工作，但之前實在太少時間陪佢，我一拍劇就全程投入，忽略咗佢，所以而家好想畀多啲時間照顧佢，盡下做老婆嘅責任。」希望不久將來，能夠聽到薇薇的好消息。