【C9特工】高海寧會體諒另一半呃自己 馬國明：要了解咗先

無綫新劇《C9特工》進行拜神儀式，該劇的女主角高海寧 (高ling) 同馬國明 (馬明) 當然有出席。呢套是高ling首套拍攝的動作劇，她說：「開工無幾日就要打喇，仲要一嚟就受傷，不過我覺得今次受傷令我因禍得福，學識咗點保護自己，早啲發生係好事嚟。啱啱開始拍嘅時候無話驚受傷，但係依家會量力而為，公司有畀替身我，如果出嚟個效果會更加好，我都會用替身。」高ling又被同劇的黎諾懿改了「豆腐ling」呢個花名，她說：「因為我成日撞到瘀晒，佢話我一撞就散。」

相比起在劇中經常要打的高ling，飾演高ling老公的馬明就舒服得多，馬明表示：「我賣菜嘅，無難度，同埋賣菜只係包裝，唔係咁多街市場口戲。套劇係講我唔知個老婆原來係特工，咁正常梗係接受唔到啦，估唔到老婆會呃自己，於是引發起一連串嘅事，講親情，都有唔少感動位。」

問到兩人如果在現實生活中發現另一半原來一直呃住自己，會怎樣？對此，馬明說：「要了解咗件事先，冷靜落嚟去諗下點解佢要講大話，睇下自己接唔接受到。咁如果佢一心想搵我笨就梗係唔得啦。」高ling亦好認同馬明所說，她表示：「兩個人喺埋一齊彼此一定有信任度，會睇係咩原因佢要呃我，睇下佢係咪有苦衷，都係睇自己接唔接受到，不過如果對方係愛自己嘅話，都唔會刻意講大話嚟傷害自己嘅。」