陳蕊蕊舉辦美人魚比賽　無意再推出寫真殺入書展

陳蕊蕊今日中午時份為自己代言嘅環保潛水品牌開幕擔任嘉賓，蕊蕊亦帶左幾名學生到場會見傳媒，因為佢透露接下來都會舉辦一個美人魚比賽，點解蕊蕊會舉辦呢一個比賽？蕊蕊解釋：「因為早前自己就開咗一間美人魚學校，宜家就舉辦一個比賽，目的主要搵一啲靚嘅模特兒，希望佢哋由0開始做一條美人魚，繼而認識多一啲海洋事情，加上重點希望佢哋宣傳海洋保育。」

蕊蕊宜家都升級做導師，蕊蕊都表示宜家好大壓力，始終蕊蕊都係全港首間舉辦美人魚課程嘅學校，但收生方面多唔多？蕊蕊回應：「講真就唔係話好多，始終都係新事情，大家要慢慢認識。」至於賺錢方面蕊蕊就回應其實仲未賺到大錢。每年七月都係一眾𡃁模喺書展出寫真嘅日子，蕊蕊都曾經推出過寫真，唔知道今年會唔會再度殺入書展呢？蕊蕊今年就唔打算推出寫真，「其實自己之前推出過寫真就冇打算再影，就算之後再出寫真都會關於海洋為主題慈善書，不過都係籌備當中，希望明年吧。」