【BB來了】與黎諾懿首合作成好友　李佳芯：喺心目中神一樣存在

TVB劇集《BB來了》7月9日播出，黎諾懿同李佳芯（Ali）喺戲中飾演新手爸媽，拍完後二人更成為好朋友，諾懿講到其實拍劇能夠成為好朋友真係好難得：「我唔知醜當Ali係我朋友先啦，唔知佢當唔當我係佢朋友，不過拍攝好開心，大家又成日一齊食飯，呢個係好好回憶。」而Ali就表示諾懿係公司裏面公認嘅好對手：「公司同事講話妳同諾懿做對手戲呀，唔洗擔心啦，諾懿佢好sweet，基本上嗰個同佢合作完都讚佢係好對手，諾懿係我心目中神一般嘅存在。」

劇中有份演出嘅BB多達6，7名咁多，二人覺得能夠順利完成呢一套劇真係好神奇，諾懿解釋：「好多時候需要小朋友做戲，但大家想一下0到1歲嘅佢哋邊識做戲，我睇咗完成岀嚟嘅片，感覺好sweet，好似一家人，好難得，希望觀眾會鍾意。」同BB做對手戲都係一件困難事，Ali就表示由佢講冇呢個說服力，所以交由人父諾懿代答，諾懿無奈地回答：「其實真係辛苦，好多時候喺廠到等，所以我就話需要一個好拍擋輔導一下，有一場7個BB拍讀書會聽落好簡單，但場面就唔受控制，結果最後我走咗去訓，因為嗰一日真係好攰，到我醒一刻望見Ali訓咗我身邊，試諗下堂堂一個女神同我訓地下，呢個感覺好有趣，自己都嚇一嚇，不過因為有時候等BB埋好位真係要好長時間。」

問到Ali會唔會已經有想生小朋友衝動？Ali覺得同咁多小朋友合作真係夠啦：「其實別人小朋友還好，但都擔心會整親佢哋，拍完我都可以番屋企休息，但拍完呢一套戲我就諗工作完後，回家仲要照顧佢，擔心佢訓唔好，冷親，又怕佢唔舒服，嗰種責任唔係開工嘅責任，所以完全未準備好做媽媽。」