【東方華爾街】劉德華續集不止做監製　應承會演出：想同大家演下

天王劉德華（Andy）以監製身分出席劇集《東方華爾街》慰勞宴。他受訪時坦言自己雖然擔任監製，但前期因為墮馬受傷，所以好多工作都未能親身參與，既輕鬆又遺憾。提到劇集已確定開拍第二季，問會否繼續以原班人馬演出，他答謂：「未知，要睇劇本係點，再諗下可以點玩同加新嘢。（演埋一份？）可以嘅，到第三、四季先啦！」席間，華哥亦向吳鎮宇、張孝全等一班演員說：「唔好意思冇時間夠大家一齊拍，知道大家都出咗好多力，希望好快有機會合作，唔單止係做監製，我仲想同大家演下！」當吳鎮宇分享自己的難忘事時，華哥又笑住唱許冠傑的名曲《難忘你》：「難忘你的姿態動靜！」非常搞笑。

至於黃國強導演則指自己都好想華哥可以幫手，而福斯傳媒集團高級副總裁嚴嘉念亦宣布ViuTV數月後播放《東方華爾街》，亦正構思第二季劇情，集數將超過五集。

提到劉德華前日（26日）獲邀做奧斯卡評審委員，繼李安、吳宇森和章子怡成為美國影藝學院會員，有資格投選奧斯卡最佳電影，華哥指自己收到消息後都好驚訝：「我自己都估唔到，『乜真係㗎』，我都開心嘅，睇咗咁多年奧斯卡，終於可以到做評審。有啲獎做評審冇得睇片，今次可以名正言順睇晒啲戲先去揀。」而講到最近經常傳出華哥老婆朱麗倩再度懷孕，他即笑謂：「我都期待緊好消息。」