【專訪‧有片】俄仔Ansheles返歸全裸焗桑拿：動作太大要打格仔！

講得一口流利廣東話的「俄仔」Ansheles，早前聯同三位fans回到俄羅斯同媽咪見面，一盡地主之誼。他們分別去到莫斯科、索契（Sochi）和喀山（Kazan），同大家介紹三地的旅遊文化。

雖然今年的世界盃在俄羅斯舉辦，但「俄仔」坦言，其實俄羅斯人並不是好熱衷踢波，他們擅長的是和冰相關的運動。講到今次的拍攝體驗，俄仔透露自己嘗試了好多平時不會做的事：「例如Bungee Jumping，因為本身我好畏高，一有相機，我咩都唔怕喇，喺索契Bungee jumping，索契有一個全世界最長嘅Bridge，有好多唔同嘅嘢玩，Swing，睇咗啲俄羅斯傳統嘅服飾。」這是不是傳說中的偶像包袱呢？

再見初戀勁尷尬　母校為俄仔驕傲

今次節目還去到「俄仔」的學校拍攝，其中一個特別之處，要數和初戀多年之後的再次見面，不過兩人一直都無聯絡，所以「俄仔」都覺得好尷尬。其實這位初戀一直都有關注俄仔的動態，令「俄仔」吃驚的是，原來整個學校都知道「俄仔」在香港的事業，為他感到驕傲。

幕前焗桑拿除埋底褲　俄仔笑言要打格仔

俄仔今次在節目中還會「犧牲色相」，事關他們去Russian sauna，儘管有毛巾「傍身」，不過俄仔就大爆自己時常不記得有相機：「本身畀咗一條毛巾我啦，但冇同我講使唔使除底褲，但係我照除啦，因為係桑拿呀嘛，我唔記得其他人要拍，有時動作會比較大啦，所以我覺得好多佢哋都會打格仔喺度，因為有陣時會見到一啲唔應該見到嘅嘢。」聽了俄仔這番說話，相信大家會自動「屏蔽」格仔喇。

俄仔不愛俄菜　薯仔餡餃子食完便秘

其實「俄仔」已經成十年沒有返去過，在俄羅斯幾乎沒朋友，隔了這麼多年，「俄仔」都表示自己會懷念家鄉的天氣和甜品：「有一種入面係cheese，出面有啲朱古力皮啦，當作係甜品，掛住呢啲食物，因為喺香港食唔到。」

拍攝期間，日日都要吃俄羅斯菜，「俄仔」就大呼自己和crew都好不習慣：「俄羅斯人又唔食飯，但係我哋喺香港呢一定要食麵或者飯先得嘛，我而家已經變咗一個香港人，唔食飯我唔會滿意，跟住食好多澱粉質，好似餃子，我哋平時嘅餃子會有肉或者菜，佢哋係餃子入面有薯仔，用澱粉質包住澱粉質，食完之後飽到想嘔。」俄仔笑言因此導致有些工作人員無法去廁所，認真辛苦。

雖然適應不了當地的食物，但俄仔就好喜歡俄羅斯的天氣，聲稱就算零下20度，感覺不到手手腳腳，只要keep住喜歡冬天的意念，就會好enjoy。不過香港這般熱辣辣，所以俄仔直言好辛苦：「成日都會出汗，屁屁會出好多汗，著好薄嘅褲就會見到出汗。」如果遇到酷熱天氣警告，俄仔就說自己不會出街，就算出去都會好快去一個有冷氣的地方，相當怕熱。

想知道更多有關俄仔的趣事，不如click入片睇下。