【深宮計．專訪】張文慈自覺學做人難過學做戲：有啲嘢唔好咁認真

提起張文慈 (Pinky) 呢個名大家會諗起咩？亞視？深宮計？於亞視出身的Pinky自2016年轉投無綫，以前在亞視做一姐的她，去到TVB卻要做配角。她在最近熱播的TVB重頭劇《宮心計2深宮計》入面飾演汪司膳，戲份唔多但也有得發揮且令觀眾同網民留下印象，演技備受讚賞。Pinky直言拍這套劇是入行以來最辛苦的一次：「好辛苦不過好值得，呢部係自己從影以嚟最認真嘅製作，我試過連續8日無瞓過覺，好彩出嚟個樣都仲keep到，做演員真係好靠意志力。」

問到Pinky覺得ATV同TVB有咩唔同，她說：「每個地方都有好同唔好，TVB嘅資源好夠，各方面嘅條件都好好，ATV好多時都係one man band，但會有一種家庭嘅感覺。」

《深宮計》是一套講宮鬥同權鬥的劇，尤其是講女人之間的勾心鬥角，正所謂多女人的地方就係是非之地，Pinky坦言：「未拍之前都有擔心過會好多是非，但原來係無嘅。我哋四司本身都係有經歷嘅人，唔會再話要鬥啲咩，大家拍劇都係求開心，我哋仲成為咗好朋友，就算拍完劇都有約出嚟聚會。」

Pinky由1996年入行至今16年，唔少人會覺得Pinky曾經是亞視一姐，如今卻只是演一些配角的角色，會好奇她是怎樣去適應這個轉變，對此Pinky說：「一姐呢啲好虛無飄渺，我自己一加入TVB就已經有晒心理準備係由新人做起，如果咁執著就好難喺呢行生存，同行之間良性競爭先係健康嘅現象嚟。」她直言現在心態已改變，以前確是會去爭，爭排位爭出鏡爭見報等等：「我細個時無咩安全感，好驚無嘢做，好怕會被人遺忘，唔知點先搵到自己嘅價值，好驚會被人淘汰，依家完全無呢啲諗法，而係會好享受演戲嘅過程，有得演戲有得發揮已經好開心。」

Pinky話自己現在的心態非常之健康，非常之開心，唔會去比較，只求做好自己。她說：「依家個世代同以前好唔同，依家有好多網上評論，都唔好睇咁多，真假唔重要，好多時因爲網友嘅誤解，有好多批評令人睇完會好難受。我依家學識咗有啲嘢唔好咁認真，要識得調校自己嘅心理，學做人難過學做戲。要識得做人但我都有保留最真嘅自己，要自己搵個中間位，要自己覺得舒服，我唔可以無咗自己。」

Pinky簽約TVB之前亦有一段日子北上到內地發展，眾所周知藝人賺人仔一定好搵過賺港幣，不過Pinky卻情願返港拍劇：「每一個人嘅搵錢能力都唔同，喺內地嘅機會係多啲，早幾年我返咗內地工作嘅酬勞確係好過香港，但自己始終都係香港人，會掛住香港，想返嚟拍劇過下戲癮，同香港嘅觀眾見下面。」

做演員總有辛酸的時候。她就話不想成日提住以前自己有幾慘有幾難捱：「做電視台藝人個個都係捱出嚟，我諗個個都會有遇過低潮時。自己入行頭10年係最辛苦嘅，因為我係家庭嘅經濟支柱，壓力好大，壓力大到會爆瘡，個人仲有少少燥狂，係2010年信咗主之後先改變咗。我以前唔識控制情緒，又好內向，試過有次我喺ATV拍拍下嘢，突然走咗去匿入廁所，掩住耳仔大叫但又好驚畀人聽到，當時覺得好辛苦，唔可以聽到任何聲音，我助手就喺外面拍門，我叫佢走話畀我靜下啦，嗰時其實我都有少少驚，唔知自己發生咩事。我唔想講到自己好慘好唔掂，唔想望返轉頭，人係要向前望向前望要move on。」

攝：陳順禎     化妝：Moon Wong     場地提供：香港九龍東皇冠假日酒店