羅志祥親力打造新男團CTO　清一色95後顏值被嫌棄

時下流行K –Pop男女團體顏值高，唱得又跳得大受歡迎，然而這個團體風氣近來吹到內地，繼舉辦選秀節目《偶像練習生》推出男子組合NINE PERCENT﹑現正透過《創造101》選出女子組合（目前比賽中）後，「亞洲舞王」羅志祥親自訓練的6人男子組合C.T.O（Create Top One）亦正式宣佈出道，今年可以話係團體年，不過一推出似乎難以避免攞來比較，6人顏值欠佳被吐遭比不過NINE PERCENT，似乎包裝仲未達到粉絲要求，睇嚟要成為今年團體一哥地位仍需努力。

唔講唔知羅志祥早在3年前已經預謀打造一個男團，所以當時就在他在台灣主持的綜藝節目《娛樂百分百》舉辦第一次選秀：「在那場選拔賽中，我選出了一些我認為不錯的男孩子，開始進行培訓，培訓的那一年對男孩們來說可能辛苦又漫長，因為他們每天都要接受不同的課程訓練。」之後隔了一年又舉辦了第二場選秀，最後基本上組成了一隊男子偶像出來，直到去年他主持《快樂男聲》時見到有天份的男孩，於是增加兩位入來，加上原先組合經過一輪淘汰戰，最終只留下四位加兩位，就形成了今日的 C.T.O。

而身為老闆的羅志祥為了令C.T.O有神秘感，在宣傳海報中只展示他們的眼睛部分，睇起上嚟個個神采奕奕應該唔錯睇，不過當見到真面目又似乎水平一般。C.T.O六位成員均是95後，包括李振緯、詹仕偉、薛恩、楊梓鑫、翁宇慶、王梓寧，事實上他們個個都具有實力，選秀節目出來功底唔算差。

不過正正現今所有團體都係透過選秀節目出來，功底好不好已經不在其下，最重要現今是顏值時代，外貌已經是粉絲第一樣應有的要求，所以他們難免會被攞來同NINE PERCENT比較，似乎後者的顏值略勝一籌獲得網友認同「這顏值差太多了吧。」當然，另一方面有人會覺得外貌不一定是全部，皆因實力先係持久戰，顏值這一樣東西只需靠包裝，不過點都好只要做好自己相信就一定會成功。