【深宮計】唐朝太平公主竟然有紙巾用　唔通又係植入廣告？

無綫重頭劇《宮心計2深宮計》已經播出了十多集，劇中的兩大陣營：李隆基 (馬浚偉飾) 同太子妃 (胡定欣飾) 對抗太平公主 (陳煒飾) 已經鬥到出面，劇情愈來愈緊湊。觀眾除了追故事之外，原來都好留心睇每場戲的細節，仲特別鍾意找出穿崩位。呢日就有網民cap了幾張太平公主的吐血圖，留言話原來唐朝已經有紙巾用，TVB好厲害。圖中的太平公主正吐住血，手上就拿住一張白色疑似紙巾的物體掩着嘴，網民就質疑她所拿的是紙巾。不過唐代就當然仲未有紙巾啦。

該劇的總監梅小青接受電話訪問時就親自解畫說：「梗係唔係紙巾啦，係絲質嘅絹手巾嚟，只不過摺到細細塊方形咁樣。呢啲絲質絹手巾係我哋特登訂造㗎，有幾款唔同嘅，有啲係純白色，有啲係繡咗花嘅。套劇入面有好幾個人都會吐血，胡定欣同周秀娜用嘅手巾係有繡花嘅，當中有故事。用白色係因為最能夠突出到吐血嘅畫面，條手巾摺幾大幾細都好講究，要因應吐出來嘅血點樣散開。所以我哋係絕對絕對唔可能用紙巾。」其實小青姐出名做事認真又高要求，又怎會犯這些低級錯誤呢。