張智霖吳鎮宇原來係榴槤發燒友　鎮宇自封專家分享下火秘技

吳鎮宇同張智霖一齊出席新戲《洩密者們》首映禮，活動期間大談喺馬來西亞拍戲趣事。原來兩位都係「榴槤發燒友」，Chilam去之前仲特登發掘左張「榴槤評分表」，實行要同鎮宇食勻馬拉榴槤！

一講到食榴槤，鎮宇笑住話：「喺當地晏晝食幾舊，夜晚再食幾舊，本身我就唔係榴槤專家，今次去完返嚟即刻變咗專家！」但係食咁多，就算唔怕身材走樣，真係唔怕燥熱流鼻血？Chilam同鎮宇即席分享食榴槤秘技：「只要喺榴槤殼入面灑鹽再沖水飲就可以下火，個榴槤殼再沖水用嚟洗手仲可以辟走啲味！」但係勢估唔到，除咗兩位爸爸之外，佢哋嘅仔仔都一樣咁鍾意食榴槤！鎮宇仲話：「佢真係好鍾意，左右手各一個揸住咁食！」

父親節就到啦，兩位爸爸又有咩慶祝活動呢？原來Chilam同鎮宇都因為工作冇得同仔仔過，不過就冇唔開心，仲好豁達咁話：「我哋一年有咁多節日要慶祝，清明重陽過年，仲有結婚周年呀，520果啲......我發現我哋真係好多節日要慶祝，依家慳返個父親節，冇所謂啦！」