陳自瑤首度現身回應婚變：呢啲新聞影響到我屋企人嘅情緒
撰文：吳子生
出版：更新：
陳自瑤王浩信傳出婚變多時，每日都有不同版本，今日老公王浩信先在ig發表言論，而老婆陳自瑤今日現身活動，一次過回應所有婚變傳聞，現場所見陳自瑤相當精神，不過傳媒焦點都落在她沒有戴婚戒的手上，覺得是婚變好大「啟示」，但陳自瑤對於這點有詳盡的解釋.......
「呢幾日嘅報導真係好攪笑，大家嘅想像力同編劇能力相當之高，將所有嘢左拼右拼，唔知點解就好了解成件事，但我係唔知嘅，咁當然啦，所有嘅報導都唔係事實，大家唔好再寫唔係事實嘅報導啦，因為咁樣真係會影響到我屋企人嘅情緒，或者係我嘅小朋友，我哋而家都係夫妻關係囉，老夫老妻咁囉，我唔想為呢件事再纏繞住喇，報導話我提出離婚啦，趕老公出門口啦，小朋友唔係同我哋一齊啦，呢啲全部都唔係事實，冇講過亦冇做過，（點解今日唔戴婚戒出席活動？）如果大家真係有興趣想知，可以回溯返好多年前，我所出席嘅所有活動，基本上都冇戴過婚戒嘅，就唔係剩係而家冇戴嘅，咁係咪代表我一開始嗰婚姻就係有問題呢？只不過我哋做呢行係少戴婚戒嘅，應該話我哋兩個都係啦，因為拍劇有好多角色身份，有時可能演人哋老婆，人哋個家姐或者女朋友，如果角色係人哋嘅老婆，咁我咪要戴兩隻婚戒？冇可能一個人戴兩隻架？我避免返工放工成日除低自己隻婚戒，我又好驚唔見嘅時候，咁我就選擇唔戴，我咁多年都好好保存，因為我好驚唔見，其實就係咁簡單。」
+9