娛樂主播簡釆恩轉戰商界做老闆 「辣妹」引入正宗川菜挑戰味蕾
撰文：洪曉璇
出版：更新：
近年有唔少主播轉換跑道，做公關做藝人，甚至好似黃婉曼咁開麵包學校，為生活帶來點新衝擊。前奇妙電視娛樂主播簡采恩（Joyee）年前離職，轉至財經界發展，最近更投資開設川菜餐廳，Joyee接受《香港01》訪問時表示：「投資咗六位數，知道做飲食唔會太快回本，但希望喺另一方面都嘗試挑戰自己。」
香港人有句說話叫：「辛苦搵嚟志在食」，每個人每日都要食飯，但市面上餐廳數以千計，要突圍而出絕非易事。Joyee一向有「辣妹」之稱，幾乎每餐都無辣不歡，但發覺市面上難覓食得過癮嘅辣度，毅然同玄學家陳定幫師傅等夾份，開設正宗四川冒菜餐廳，開幕當日仲有大批藝人好友及一眾奇妙電視前同事撐埸。
+1
Joyee表示呢次學做生意全因心態轉變：「因為都29+1啦，覺得人去到某個階段要去轉變，唔應該停滯不前，自己希望真正做到活到老學到老不斷進步。做娛樂得到滿足感，但希望喺另一方面都嘗試挑戰自己。」又要兼顧財經主播工作，又要返餐廳親力親為，另一半又會唔會投訴呢？Joyee話：「其實男友都對財經同風險管理有認識，反而依家仲多左話題。舊時財經新聞唔明啲野依家同佢可以討論到。」