余香凝樂與妹妹余潔瀅合唱 最愛係TWINS：細個我扮阿Sa佢扮Gil
撰文：鄺鈺瑩
出版：更新：
余香凝21歲餅印胞妹余潔瀅（Zoe）以《美女廚房》學徒身份正式加入娛樂圈，身為家姐嘅余香凝當然力撐，今日佢就孖住細妹Zoe一齊自彈自唱新歌《黑暗之外》，並將片段放上IG，雖然妹妹只係在旁做和音，但唔少網民睇完之後都表示兩姐妹十分合拍，亦有人提議可以一齊唱LIVE，推到新歌之餘，亦可以sell埋妹妹幾有才，余香凝真高招。
余香凝接受訪問時透露兩姐妹小時候已經常合唱。「大家好鍾意TWINS嘅時候，通常我扮阿SA佢扮阿Gil，學佢哋啲動作跳晒舞，我記得小學時，如果阿妹跟住我唱的話，我就會好霸道咁覺得唔可以，然而轉歌，但佢都會照跟住唱，但依家就無呢個問題，因為覺得有佢和音好好玩，同埋同佢把聲都好似，好有默契，出來成件事好夾，我都希望會作到一首送比媽媽或者係講姐妹情。」對於有網民指兩姐妹聲線十分相似，余香凝就表示無所謂，更笑言最緊要唔好認錯樣。「試過有朋友走去同妹妹打招呼，佢個樣好錯愕，後尾朋友講返以為我無禮貌。」