【多圖】港姐宣傳片陳凱琳都唔夠佢瘦？ 劉穎鏇出招3秒變小蠻腰
2018年港姐招募，正在密鑼緊鼓進行中，而幾位港姐冠軍亦被徵召拍攝宣傳片，包括有陳凱琳、麥明詩、邵珮詩及馮盈盈，還有一位是劉穎鏇，咪住，她明明是2016年的港姐亞軍，卻頂替了應屆冠軍雷莊𠒇。無他嘅，雷莊𠒇拒絕簽約無綫，咪拍宣傳片都無份。幸好劉穎鏇都是公認的靚女，放在4位冠軍身邊半點也不輸蝕，而且她還有秘密武器，拍攝時可令條腰睇落瘦2吋，究竟是什麼瘦身神器呢？下文自有分解。
該條港姐招募宣傳片，幾位港姐各展美態，除了靜態擺甫士外，也不乏充滿動態的運動美感，像身材惹火的邵珮詩，在馬路上踩滑板，而麥明詩除了揸跑車外，又大跳勁舞，至於劉穎鏇就不停打拳做gym，而陳凱琳和馮盈盈雖然未有激烈表現，也各自顯露獨特氣質，5位港姐確實相當養眼，而且身材亦十分窈窕，最讓人想不到是一向有少少Baby Fat的劉穎鏇，驟眼睇竟然擁有小蠻腰，甚至瘦過出名slim的陳凱琳，在宣傳片的最後一個畫面，謎底終於揭開。
相關文章：
5位港姐一字排開，各有美態，正當劉穎鏇稍稍向右轉身時，竟然清楚見到後腰間有一隻衫夾，原來是用來夾實件鬆身運動背心，令整個人的線條更加突出，十分蠱惑，只是想不到會出現這個穿崩的蝦碌畫面。劉穎鏇接受《香港01》訪問，她表現得有點不好意思，「我都無留意到，因為我嗰日著件衫比較鬆，出到嚟個畫面鬆泡泡，我同導演諗過點樣令到件衫好啲，令到個畫面靚啲，最後決定用個衫夾夾住。」
她笑說：「其實都係用咗一個夾啫，本來件衫上身slim，下身較為闊，為咗一致啲，就夾一夾條腰位，睇落咪Fit返個身。(拍攝宣傳片前有冇去做運動Keep吓？)真係無機會特別去做運動，呢排都好忙，段片係我生日前拍嘅，嗰段時間成日出街，又要開工，無乜時間做gym，加上我媽咪返嚟香港探我，都無乜機會運動。」其實劉穎鏇身材都相當標準，但用了這個秘密武器，體態再提升多一個層次，以後絲打影相、拍片之前，記得帶定衫夾，效果確實幾好，各位絲打要學嘢啦。