陳庭欣認同富商關係密切　有打邊爐玩啤牌：我不嬲都唔鍾意放閃

陳庭欣（Toby）傳一腳踏兩船兼撻著現年40歲身家逾億的彩豐行老闆楊振源 （Benny），早前Benny前度劉依靜（Ruby）開腔回應傳媒暗指Toby就是戀情的第三者。今日（6月3日）Toby出席《宮深計2深宮計》活動時，亦罕有地作出公開回應。

對於報導指Toby拜金而搭上富豪，Toby：「其實我好清楚自己性格，我性格好倔好男仔頭，有啲嘢係唔會屈服，即係唔可以用金錢去買起我某一啲諗法。其實700幾萬人入面有好多人都唔係住緊私人樓，甚至住緊劏房、公屋，同人share屋企，所以我唔覺得自己係寄人籬下，我唔覺得我係自卑嘅一個。我係努力地儲緊錢去買個家俾屋企人。只不過儲嘅時候唔係去街市買棵菜，係要時間去安排。亦都希望係呢1，2年嘅事。」

至於Toby現時是否與彩豐行老闆Benny相戀中呢？Toby接受《香港01》訪問時說：「我宜家係同Benny一齊去到一個幾了解對方同幾能夠相處嘅階段。我都係咁講啦，感情事我不嬲都唔鍾意放閃，所以過咗今晚之後，我都係想keep返同自己屋企人（交代）。」訪問中，Toby亦表示自己與Benny是在2年的一個朋友聚會認識，但直至幾個月前才開始與Benny聯絡，當中交流亦有通電話，傳訊息等。「打邊爐玩啤牌嗰啲都有，不過係最近呢幾個月嘅事。（最近3，4個月？）無謂數得咁清楚啦。總之係過去果段2年嘅感情已經講清楚。」

Toby續說：「今次係入行以來第一次公開講自己講自己感情事，一直以來我都覺得感情事係要留俾自己同對方，屋企人同埋屋企三隻鸚鵡，但係我又覺得自己做藝人就預咗要公開自己嘅感情事，所以今次有幾樣嘢，寫得令我覺得超過自己道德底線。其中一樣嘢就係我感情未完嘅時候，就開始另一段感情，呢個係錯嘅。過往嘅感情都有差唔多2年時間，當中相處有開心亦都有唔開心。我都明白報導係需要吸引大家眼球，但係再食死貓我覺得就唔可以囉，因為食得多死貓會唔健康。」