【刑事偵緝檔案】點解冇咗Madam雷？　大勇突然換環頭原來有玄機

無綫深宵時段重播的《刑事偵緝檔案III》，繼續由大勇和義仔調查兇案，而將軍澳警署的一班手足，竟然無乜表現？當然啦，大勇同義仔已經調了環頭，變成馬鞍山警署，順理成章大勇班下屬要大換血外，他亦要跟過一個新上司，金興賢飾演的警隊總督察詹sir，這個設定唔多唔少都帶給觀眾陌生感覺，仲有粉絲話好掛住林漪娸飾演的Madam雷，今次就由該劇監製潘嘉德解開Madam雷被消失之謎。

在前兩輯的《刑事偵緝檔案》中，大勇上司Madam雷，一直甚受觀眾歡迎，雖然她查案斷估，又經常錯誤引導大勇和義仔的查案方向，但說到底有個靚上司，又確是養眼得多，但來到第3輯故事，竟然講到大勇、義仔調了去馬鞍山警署，至於將軍澳警署，由Madam雷到芬女、孟波，全部被消失，換上新上司詹sir，一班手足亦大換血，變成思龍、阿田和靚冰等人，究竟為何會有這個設定，唔使搵大勇去偵查，直接問該劇監製潘嘉德。

德哥接受《香港01》訪問，他知悉觀眾掛念Madam雷，無奈表示「香港觀眾思想真係好狹窄，美國嘅警匪片，每季都唔同人啦。(點解會有咁嘅設定？)都係想俾啲新嘢觀眾，而且套劇成40集，無新嘅嘢點拍落去呀。」不過網民最關心都是Madam雷，而當年劇中大勇要轉環頭，還有一個講法是因為林漪娸有多齣劇集在身，包括《O記實錄II》、《天地男兒》、《壹號皇庭V》，林漪娸根本是分身乏術，未有檔期接拍《刑偵III》。

相關文章：

【刑事偵緝檔案】兇案現場竟然係澄碧邨堅離地　殺人逃走都唔方便​

【刑事偵緝檔案】林漪娸參選港姐當年係靚女　任達華都要演佢老公

對於其他劇組「搶人」之說，德哥大方表示：「佢(林漪娸)一向都好多劇拍，由我離開無綫之前，至到我走咗，佢都仲拍緊。」德哥說劇中多了很多人，好像羅冠蘭飾演郭可盈的阿姨，觀眾一樣受落。當然取代Madam雷的詹sir，亦不是行行企企的閒角，他將會是大結局時的Big Boss，不過掛住Madam雷的網民亦不用失望，她將會在39、40集再次登場，將詹sir繩之於法。