林子善前女友報復反令自己難堪 分手忌八婆罵街
撰文：冼燕珊
出版：更新：
藝人林子善新婚不久就被前女友 L 爆出「情慾對話」，而男主角也火速回應，指老婆睇到短訊的反應係「笑咗出嚟」。其實 L 這樣「反轉豬肚就係屎」的行為，其實不但損人不利己，更是賠了夫人又折兵，不僅得不到同情，更落得「八婆」的罵名。
分手最忌潑婦罵街，一段感情好應該好來好去，無論男女分手都應該分得瀟脫一點，在閨蜜面前喊吓鬧吓個衰佬咪算囉，將過去肉麻閨房情話放上網，對自己又有什麼益處呢？即使妳打算「攬炒」都要嗌贏場交，就計錯晒數了，因為這種行為嘅結果只會係 Total lost 。
第一，出師無名。如果林子善無講大話，他跟 L 是在與 Kary 分手後才在一起，那麼當時二人的關係光明正大，實在沒有什麼後腿好抽，大家不會同情女方。
第二，天下有哪對情侶不親密，在熱戀期間的情話，即使再露骨都是二人之間的事，況且林子善又不是說了什麼失德的說話，對著情人說情話非常正常，完全沒有可以控訴的空間，反而女方竟將二人之間的對話公諸於世，做法實在可恥，相信廣大港女都不會站在女方嗰邊。即使真如傳聞所講，林子善是為了追求自己而與 Kary 分手，又如何？事實是最終成為林太的人不是自己。
第三，這樣做反而令林子善更確定當日分手是最正確的決定，令他更珍惜老婆 Kary，自己在對方心目中僅剩餘的一丁點形象都無埋，連林子善自己都開到口說：「係自己唔好彩，不過都好彩我走得快」。當妳以為可以用以往的情慾對話來破壞對方感情，人哋都係得啖笑，真係輸得毫無尊嚴。
其實只是一段個幾月貨仔的感情，應該談不上刻骨銘心，何必要咁心狠手辣，而且都過咗咁耐，再重提舊事，只顯得自己不夠大方，好好地Move on ，成為一個Better me，專心追求自己的幸福不是更好嗎？
+2