【深宮計】米雪客串3分半鐘觀眾未夠喉：拍緊《溏心3》冇時間！
撰文：陳栢宇
出版：更新：
《宮心計2深宮計》第1集最好睇的部分，一定是第一節中飾演韋后的米雪姐在大殿上灑溪錢後被馬浚偉、馬國明合力誅伏一幕。雖然客串演出的米雪姐出場時間得3分半鐘，但她的出現就令到整集氣氛提升不少，引觀眾繼續想睇落去，而米雪姐本身亦演得出韋后的霸氣。好多觀眾都覺得米雪姐出現時間太短，好唔夠喉，她接受《香港01》訪問時就話因為當時正拍攝《溏心風暴》，所以好難騰出時間拍攝更多場口：「好多謝監製梅小青同TVB特登寫呢場戲畀我。」
至於該場是否拍攝得好辛苦？米雪姐就指雖然出街得3分半鐘，但當時拍了足足30多個鐘：「由朝頭早拍到第二朝，食完早餐，再食埋晏，先至拍完。係好開心嘅，有一場咁精彩嘅戲喎。」她又指《深宮計》拍得非常認真：「大家有冇留意第一個Shot，我一路灑溪錢，佢就好遠咁一路Zoom埋嚟，呢度試咗成兩個鐘，所以拍出嚟大家都話好睇，因為有個深層次喺度。」
好多觀眾都覺得《深宮計》對白用字艱深，但米雪姐就覺得對白不算難記：「拍得花時間都係燈光、走位上，好認真，我叫觀眾唔好眨眼，每一個鏡頭都係戲，每一個鏡頭都好靚，我自己都好鍾意。」而她又笑指自己最喜歡吊威吔部分，因為可以飛來飛去。