王敏奕（Venus）係電視劇《飛虎之潛行極戰》中的唯一女飛虎，所以非常受注目，成為焦點後 Venus 工作量大增：「其實宜家都多咗好多新嘗試洽談中，但就未能透露，不過其實都一直有品牌代言搵我嘅。」

王敏奕（Venus）今晚出席《飛虎之潛行極戰》慶功宴。（陳順禎攝）

工作量多咗，收入隨之增加，加上男友曾國祥憑執導《七月與安生》而聲名大噪，大家都事業愛情兩得意，最近兩人被影到搬入貝沙灣豪宅居住，Venus就話冇乜所謂：「其實已經畀人跟咗幾日，初頭都擔心唔知咩事，因為我咁悶都跟，咁我覺得冇乜事嘅，因為都係一件開心事嚟，住得舒適。」對於被指居住環境升呢全靠男友付出， Venus 就表示唔同意：「其實我都有一齊努力，不過好開心住到一個好環境。」

Venus 最近同男友曾國祥搬入貝沙灣，對於被外界指係依靠曾國祥，佢就表示唔同意。（陳順禎攝）

今時今日，年紀輕輕就住到貝沙灣真係唔簡單， Venus表示因自細就要照顧屋企人，身兼母職嘅佢就話最重要懂得理財。作為家庭支柱嘅 Venus ，養家對佢嚟並唔係一種負擔：「當自己能力越大，責任就越大。」

Venus自小要擔起頭家，佢覺得當自己能力越大，責任就越大。（陳順禎攝）

王敏奕被爆搬入貝沙灣：係一件開心事