【創造101】許靖韻晒自彈自唱成點讚王　Ella：她在唱歌上面很穩

內地選秀節目《創造101》已經進入第二輪比賽，唯一一位香港代表許靖韻（Angela）再次登場。經過之前分班、分組對決後，今次練習生們要從唱作、舞蹈或聲樂中，三選一作為專業考核主題。今次Angela喺台上自彈自唱嘅表現令一眾導師及觀眾眼前一亮，為佢之前喺跳舞方面的失分挽回唔少分數，最後佢仲拎埋組內「點讚王」稱號，令佢感動落淚。

其實喺訓練期間，同組練習生同Angela，喺聲樂堂中明顯見到有好大差距，無論喺鋼琴彈奏、歌曲旋律、又或者音準，Angela都拿捏得恰到好處，就連擔任聲樂老師嘅Ella都對佢讚口不絕：「她前幾集的表現，一直在做她不擅長的事情，所以排名較尾。其實許靖韻讓我覺得在唱歌上面很穩！」

Angela一組選擇演唱Justin Bieber嘅《Let Me Love You》。節目開場，Angela坐喺琴前先為組員們伴奏，輪到自己唱時，導師同練習生都露出讚嘆神色，現場歡呼聲不絕。每組演唱後，現場觀眾都會投票選出組入面嘅「點讚王」，當導師宣佈Angela成為組中「點讚王」時，佢即刻爆喊，因為經過上一次佢最唔擅長嘅跳舞對決後，Angela嘅排名跌到五十四（尾二），所以今次一宣佈佢係「點讚王」時，難怪咁激動。

「謝謝大家的點讚，因為我是墊底晉級的……我來之前我不會舞蹈，話也說的特別差。」然後其中一位導師胡彥斌就問Angela：「你自彈自唱鋼琴，為甚麼沒有選我們唱作組啊？」Angela邊抹眼淚邊話：「因為我知道，這一次可能是我最後次站在101的舞台上，然後我想選我最擅長的東西，就是聲樂，讓我可以再一次站在101的舞台上。」最後，導師Ella亦都喺台上話：「恭喜你靖韻，你做到了！而且你成為「點讚王」，我真的很為你開心。」