【深宮計】陳煒毒打袁潔儀20年 究竟太平公主係咪天生殘暴？
撰文：關穎賢
出版：更新：
《深宮計》播出第7集終於開始入戲肉，劇情講到太平公主(陳煒飾)無論如何都要阻止太子妃(胡定欣飾)重建回心院，原因係太平公主將司膳房女史吳翠瑩(袁潔儀飾)囚禁喺回心院，並將佢用鐵鏈鎖住毒打20年，挖去其雙眼，再喺額頭上劃上「舌」字，仲用翠瑩家人嘅生死去威脅佢幾辛苦都要保住條命，如果唔係男嘅就凌遲處死，女就削成人彘，最後更迫到吳翠瑩吐血身亡。究竟點解要費盡心思去折磨一個女史？全部都關係要為愛報仇。
話說當年太平公主嘅先駙馬兄長薛顗涉嫌謀反，吳翠瑩因為如實報導見到先駙馬同薛顗有書信來往，所以武則天為咗斬草除根而將先駙馬一齊問斬，所以太平公主就認為吳翠瑩口舌招尤間接害到先駙馬被問斬，而呢件事就證明到太平公主極為心狠手辣、殘忍冷酷。
據歷史記載，太平公主都唔係一生出嚟就咁心狠手辣，身為武則天最寵愛嘅細女，自細集萬千寵愛於一身。當年武則天同李治因為唔畀太平公主嫁去吐蕃，不惜要佢入住道觀，成年後就下嫁李治外甥薛紹，就算知道母后覺得薛紹配唔上自己，但公主仍然維護愛夫。太平公主原本只係一個天真無邪、不問世事嘅女子，直到薛紹被指有份謀反被問斬後，痛失所愛嘅太平公主就開始覺得變得心狠手辣。同時因為遺傳到武則天嘅政治才華，加上當武則天死咗之後，太平公主想好似母后一樣成為皇帝君臨天下，而眷戀權位。為阻李隆基登上皇位，太平公主施詭計陷害對方，親戚都冇情講！
到李隆基登上皇位後，起初權力都落於太上皇李旦手中，而李旦咩都聽晒太平公主話。控制到李旦之後，太平公主就更加放肆，指使宮女喺李隆基膳食中落毒，由於李隆基對太平公主處處提防，最後都落唔到手。落毒失敗後，太平公主豁出去發動兵變迫李隆基退位，但遭兒子薛崇簡勸阻，太平公主完全不念骨肉之情，連自己個仔都唔放過，打到血流披面，可想而知太平公主為咗奪權有幾咁毒辣。