【有片】Dear Jane重塑音樂風格　放棄失戀系列：觀眾太expected

Dear Jane過往有不同類型的歌曲，但歌迷最賣帳的均是情歌，單看以《哪裡只得我共你》開篇的失戀三部曲是何等令人津津樂道就知道，雖然不少人仍期盼會有四部曲，但為怕被聽厭、被習慣，Dear Jane決心擺脫舊有曲風，到底會行先死先，抑或快人一步理想達到？「其實勁擔心，因為萬事起頭難，但再唔出歌唱片公司真係會炒咗我哋。」

三部曲後，Dear Jane彷彿沉靜了一陣子，先不說別的，2018過了一半他們才派第一首歌，不擔心會影響年尾樂壇頒獎禮的成績嗎？Howie說：「創作唔可以用365日去計，這會做成了局限，如果唔趕目標、唔追播放率可能創作出勁嘢，但亦有可能會被遺忘……我哋依家都試緊。」過去大半年時間，他們除了內地騷、廣告歌、跟其他歌手cross-over之外，大部分時間都在「改變」：一手打碎花了多年時間、心血令樂迷認得的Dear Jane風格。「感覺上做到了第一粒音響起大家都知道就係Dear Jane，但又會感受到觀眾已經太expected，如果再咁樣落去，樂迷會厭，創作人一定要行前一點行快一點，係會辛苦但都要做。」

Tim記得去年在髮廊時Howie用結他彈奏了《深化危機》的一小段melody後，他們便開始構想這會是什麼模樣的作品。Howie接力補充：「我們剛開始時玩港式Punk Rock，但其實咁多年有幾多樂隊可以專注咁玩？既然我哋係隊勁唱情歌的樂隊，咁不如一次過轉晒，做一隊暫時離開搖滾世界的樂隊呢？」對於這次的改變，他們一致認為是順利，亦已盡全力，音樂版圖上多了一種嘗試，接下來不排除有pop music、urban music。

「其實我想用兩年時間才出歌，但原來香港係唔得，你試想我哋係改風格，唔係有錢就做到，而係要用時間去沉出來，半年唔應該會做到，但一定要出，如果唔係唱片公司會炒咗我哋……」話說他們在製作三曲部時，也遲了半年，另外，去年原定有5首派台歌，結果因為種種原因，最終只派得兩首……要炒他們真的有很多理由。「今年計劃係有晒，但因為轉style所以每樣嘢都會慢好多，依家學會睇schedule做嘢、爭取有啲歌要出到之餘，亦會睇吓係未達到預期……」
 

去年Dear Jane開展了內地市場，每次開騷都有驚喜，例如是樂迷會唱他們從未plug過的歌、陪朋友看他們演出結果變成了歌迷……Jackel說：「如果只留喺香港，根本唔會知道其他地方都有人聽Dear Jane，呢個都幾能夠支撐我哋繼續去不同的地方，親身接觸更多樂迷。」問到北上發展後，收入可有大增，Tim非常坦白說並沒有明顯的增長，更指他們的收入是公司抽佣後再拆四分，開玩笑說在這狀態下也能換大屋，他說：「所以好鬼辛苦囉。其實係我同太太仲有BB的一項投資，而在這之前亦需要放盤另一個身業才做到。」問到其他三位可會以Tim以目標，Howie輕嘆了一聲:「老婆都未娶，換咩樓，想食啖住家飯都無……（下刪一千字）」

Hair：Carmen Ngai@HAiR
Make Up ： German Cheung
Wardrobe：MUSIUM DIV. from i.t
Venue：Studio King