【深宮計】得罪了化妝師搞到高低眉？　胡定欣：面部肌肉郁動

無綫重頭劇《宮深計2深宮計》昨晚播出的第三集入面，最具話題性的並非劇中一眾演員怎樣大鬥演技，又或是勾心鬥角的劇情，而是胡定欣所飾演的王蓁的妝容，她的高低眉成了成集的焦點。昨晚胡定欣相當多戲份，幾乎每一節都有出場，無論邊個場口，定欣的兩邊眉都有出現高低差別的情況。其中她與馬國明兩人單獨對話的一場戲，高低眉更是特別明顯。另一場她吩咐近身侍婢的戲份，亦一樣清楚可以看見她有高低眉，就連TVB官方發放的劇照中也有這一幕，所以照片中的定欣也是高低眉的，唔通TVB覺得無問題？

由於定欣今集keep住出現高低眉，實在太搶鏡，隨即引起網民熱烈的討論，有人甚至推斷定欣好有可能是得罪了該劇的化妝師，先會如此被對方整古。問題是定欣自己無照過鏡的嗎？她自己又有無看過play back？如果她有睇到呢集會有咩感覺？定欣今集咁明顯的高低眉，亦有可能是因為她演戲時面部表情太用力所致，因為面部肌肉郁動絕對會影響條眉。而睇返定欣自己於instagram post的相就無高低眉的問題，所以可以肯定她本身並非高低眉的。

定欣接受電話訪問時，終於親自將謎底解開喇，她表示：「哈哈，我知道呀。其實同化妝無關，係我做表情嘅時候，眉頭嘅肌肉就會不其然摵起咗，所以唔係化妝化到高低眉，唔關化妝師事，係我嘅肌肉問題。其實一路以嚟我都會有時遇到呢個問題，因為做戲嘅表情令到眉頭嘅肌肉摵起咗，大家喺畫面度先會睇到我有呢個情況，平時正常咁睇我係無事嘅。