【東方華爾街】劉德華堅持為港劇覓新題材 「雖然辛苦但都要做」
撰文：許育民
出版：更新：
由企鵝影視及福斯傳媒集團聯合製作，原創迷你劇《東方華爾街》將於明日（24/5）首播，今日就特別舉行全球發佈會，監製劉德華，以及一眾主要演員吳鎮宇、張孝全、譚耀文、張可頤、廖啟智、陳家樂、蔡潔及廖子妤都有出席。
身為監製的劉德華，見到劇集順利推出都非常興奮，回想籌備過程，由於是香港少有的金融劇題材，更有海量的參考資料，過程都相當艱辛。劉德華：「雖然是辛苦，但是需要做。」
張孝全最初怕咗鎮宇
《東方華爾街》全5集的內容，故事圍繞近20年亞洲金融的發展。兩位男主角是第一次合作，張孝全就坦言有點緊張。「最初有啲緊張，因為跟鎮宇哥不認識，他又不太說話，所以會有距離感。」不過合作過後，因爲鎮宇經常放工後帶大家搵好嘢食，好快就熟絡起來。
至於吳鎮宇，就非常欣賞迷你劇5集的長度。「電影有時太短，5集嘅內容就有較大發揮空間，唔會有太多無聊的對白，反而每句都要你嘴嚼一下。」
劉德華：「第二季會有桂綸鎂」
至於監製劉德華及導演黃國強，整套劇花了3年時間籌備，最主要原因是金融題材比較複雜，資料太多又會變成教科書一樣，所以期間要推倒重來。
作為監製，劉德華向來參與電影較多，點解今次會對劇集有興趣？「因為我是拍電視劇出身，而家劇集製作質素愈來愈高，所以我一定會拍番劇集，看看將來如何安排。」第一季明天首播，但華仔就率先為大家帶來第二季的喜訊。劉德華：「製組搵到桂綸鎂演出，我沒有落嘴頭的，純粹用劇本打動她，事實上她的角色寫得好好，好到我都想演。」