【多圖】梁家輝與太太結婚31周年　超動人愛情故事牽手到老

年輕時拍拖追求驚天動地，轟轟烈烈嘅愛情，隨住年紀漸長，慢慢發現細水長流、平淡嘅幸福先係最長久。出名係愛妻號嘅梁家輝，同太太江嘉年相知相許數十載，佢地嘅一對孖女梁穎晨（Chloe）同梁靜禧（Nikkie）呢日上載多張相片，原來呢日係梁家輝同太太結婚31周年嘅日子，佢地一齊切蛋糕，對照當年嘅結婚相，真係恩愛如惜令人羨慕呀。

520，普通話諧音係「我愛你」，原來1987年即係31年前嘅呢一日，正正係梁家輝同太太結婚嘅大喜日子，佢地嘅囡囡Chloe同Nikkie分別上載多張照片，相中佢地手疊手一齊切蛋糕，家輝仲肉緊攬實太太伸脷索吻，氹得江嘉年笑到見牙唔見眼。佢地一家四口似乎又再一齊外遊，見到梁家輝攬住太太瞓喺沙灘嘅網床上相當寫意。

之前接受訪問時，梁家輝曾經講過，當年對任職香港電台嘅江嘉年一見鍾情，結婚31年來同太太都未試過嗌交，每當外界指江嘉年樣貌體態走樣配唔起丈夫時，梁家輝都會立刻反駁：「我太太是世上最好的女人，是她的好激發了我的好。」依家嘅梁家輝係型男係影帝，但回想當年娶江嘉年時，卻是默默無名甚至完全無工作，戶口只剩下8000蚊，但當時外型出眾嘅太太卻願意下嫁，令梁家輝相當感動。

到1990年，梁家輝憑《愛在他鄉的季節》成為第27屆金馬獎影帝，喺台上感性告白：「她是在我最失意、最沒有希望、最窮、最潦倒的時候，嫁給我的，不管今天還是以後，我拿到什麼榮譽、什麼獎品、什麼獎金、什麼薪水，反正是一切啦，我都要跟她一塊分享。」對於愛情，梁家輝的見解是：「一對戀人，頭一兩年拍拖，那是戀情；之後的十年八年，是感情；如果三十年後你仍會拉她的手上街，那才是真正的愛情。」結婚31年，繼續拖住手到處走，呢個正正係幸福嘅寫照。