【再見亦是朋友】Wyman慶生星閃閃　容祖兒劉浩龍大方合照

分手後到底會變陌路人，還是可以再見亦是朋友？好多時取決於兩個人嘅心態，如果身處同一朋友圈，好似容祖兒同劉浩龍咁，大大方方做返朋友，可能更開心。師兄同JOEY雖然5年情斷令大家感到相當可惜，不過佢地嘅感情似乎已經昇華，繼早前師兄開SHOW時，JOEY不避嫌撐場仲企定定任影唔嬲，呢日又一齊出席黃偉文生日會。

今日（5月21日）係Wyman 49歲生日，大批圈中好友出席佢嘅Bling Bling生日會，好似吳君如、陳可辛、徐濠縈、鄭欣宜、薛凱琪、王菀之等，個個都配合主題著到勁閃，大合照中見到Joey同師兄大方企埋一齊，再見亦是朋友算這種。Joey留言祝賀Wyman話：「以後都要冰冰（Bling Bling），只有這樣我們就可以永遠的撞衫。親愛的，生樂身康（生日快樂身體健康）。」

每次同好友相聚時光都總係過得特別快，早前Joey孖住克勤去到廣州出席《音樂先鋒榜頒獎禮》，兩個人分別掃走五個獎項，連埋同公司嘅泳兒、洪卓立、吳浩康及鍾舒漫，一共捧走十八個獎項，可謂今次頒獎禮嘅大贏家。Joey表示好開心《重生》呢首歌得到大家嘅肯定，「雖然舊年嘅作品比較少，但嚟緊無論國語或者廣東歌都好快會同大家見面，希望能夠繼續得到大家嘅支持。」