【多圖】又一新聞之花封盤　張文采婚照曝光年尾榮升人妻

新聞主播嘅專業形象，加上日日喺電視螢幕前同大家見面，相當有親切感，一眾新聞小花仲吸引到唔少支持者，可惜近幾年一個個離開熟悉崗位，轉行嘅轉行，組織家庭嘅專心相夫教子。剛度過33歲生日嘅「新聞之花」張文采，原來都即將嫁作人妻，佢同圈外未婚夫嘅兩輯婚紗照曝光，非常甜蜜呀。

張文采入行十年，由新聞主播做到廣播總監逐步退居幕後，同期戰友們都相繼離巢，一班新聞主播雖然已各散東西但友誼長存。姚雋彥、李朗怡、陳正犖等新舊同事為張文采慶祝33歲生日，相片中見到張文采身穿鮮紅色背心，見返一班戰友睇嚟傾得相當開心。姚雋彥仲留言話：「同準人妻慶祝最後嘅單身生日派對之餘，仲收到多一個好消息，呢個周末真係雙喜臨門！」意外公開張文采婚訊。

為咗維持專業形象，新聞主播嘅感情事一向要低調處理，大家只知張文采同前TVB藝人羅鈞滿拍拖四年，最終不歡而散。分手三年原來張文采已即將成為人妻，喺網上搵到張文采同未婚夫Benedict嘅兩輯婚照，一輯喺日本輕井澤取景，櫻花樹下兩個人拖住手望向遠方，相當有默契；原來早喺上年年尾佢地亦喺香港影過一輯婚紗相，去到中環鬧市、地質公園以及石澳。迷人嘅石澳星空下，非常唯美浪漫。據知張文采嘅未婚夫係消防員，婚禮將於今年十月舉行，佢嘅舊愛羅鈞滿亦祝願文采新婚快樂。