【牛下女高音】54歲龔慈恩容顔不老有原因　同囡囡護膚方法有唔同

龔慈恩時隔22年再重回TVB拍劇，真係咩回憶都返晒嚟。想起對上一套龔慈恩的TVB劇，已經是1996年的《西遊記》中的觀音，雖然96年的時候還未流行甚麼宅男女神，但當時的她就已經風靡萬千。如果再細數青春少艾時龔慈恩，就更加不得了。

現年54歲的龔慈恩，雖然已經踏入「美魔女」行列，但仍舊保養得宜，與18歲女兒林愷鈴合照時也絲毫不遜色，甚至乎仲有啲似兩姐妹添。今日（5月18日）龔慈恩出席《牛下女高音》造型活動時，就分享了些護膚心得。龔慈恩説：「我覺得而家冇醜嘅人，只有懶嘅人。我覺得應該係唔同地方、唔同時間，對自己都有一個敏感度，點樣調整。打個譬如，我去北京拍戲，我會用個加濕機，因為天氣乾；如果去東南亞拍戲，我就用啲蘆薈，因為皮膚曬得多，佢可以消炎。同埋而家資訊咁發達就可以做下功課，但係唯一一樣就唔可以盲從，要清楚自己今日要做啲咩，再做適當嘅護膚。」

龔慈恩笑說：「譬如囡囡偷我啲化妝品護膚品嚟用就唔係好啱用嘅。」龔慈恩解釋到，不同年齡皮膚是需要不同的護理，就個例子來說，「敷mask」也是因應各種天氣地方場方而用各種的「mask」。龔慈恩：「我自己唔會keep死用嗰幾隻mask。而家呢個年代呢，我覺得都唔使用一啲好貴嘅產品，譬如夏天就應該著重多啲美白。」

其實對於mask的用量品種，原來「美魔女」龔慈恩都好有研究，不同環境場合，她也有不同的「mask」應對。「譬如我嗰日曬完返嚟，我返到屋企會敷美白mask；如果我今日開全日工嘅話，我就敷好滋潤嘅；甚至乎我係戲與戲之間有時間或者食lunch，我會喺眼袋位再敷返個eye mask。（一年計，用過有幾多種mask？）都有20隻，哈哈，其實我都幾expert㗎啦。（大槪幾錢？）平嘅$8一塊貴啲嘅$100塊都有。」所以話，做「美魔女」保養好皮膚，一啲都唔簡單。