【馬明發脾氣？】前大台幕後網上公開藝人「臭四」名單

一般觀眾多數淨係睇到藝人幕前光光鮮鮮、靚仔靚女嘅一面，鏡頭以外就一無所知，只能靠睇八卦新聞自行幻想。最近網上討論區有個聲稱剛剛辭職離開大台的前TVB收音師開Post（簡稱前員工），歡迎各位發問。好多人見到就好有興趣，覺得係「機會黎喇飛雲」，不停問啲大台內幕嘢，例如「邊個Artist好臭脾氣」？、「十個最Nice嘅藝人」等等。講到臭脾氣藝人，呢位TVB前員工就話最深印象係「21800000」同「Laughing Gor」，嘩～～咦～～？！其實同開名冇分別。不過樓主後尾有為21800000兜返，話做耐咗、見多幾次就冇嘢，可能係未熟絡啫⋯⋯

FYY同江嘉敏最正　祥仔演技依然No.1

至於「十個最Nice嘅藝人」，前員工又話加入咗《學是學非》冇耐嘅鄺潔楹係最Nice，之後就排名不分先後，包括：陸永、C君、江嘉敏、張繼聰、陳豪、黃心穎、馮盈盈、何遠東，同埋《Think Big天地》幾位女主持。

講到人見人愛嘅馬國明，佢又咁樣評價？「人幾好，但見過（佢）無啦啦發老脾！」Post入面亦有網友問樓主，覺得邊個女藝人最正，佢話自己覺得FYY（馮盈盈）同江嘉敏最正，但就冇講點解。最近好多觀眾都覺得黎耀祥演技「回塘」，喺《逆緣》表現唔到應有水準，但樓主仍然覺得黎耀祥係咁多個藝員之中演技最好嘅一個。

點擊重溫《香港01》為鄺潔楹影嘅靚相：

做「邵逸夫獎」最深刻　入電視台打工最忌認叻

咁當然都有好多人對樓主份工本身興趣大啲，有人問佢喺大台6年最難忘嘅事係乜，佢就咁答：「啱啱入去做無耐，六叔（邵逸夫）個頒獎典禮（「邵逸夫獎」），由第一日凌晨四點入去Set嘢，做到On Show收嘢，已經係翌日凌晨兩點幾三點。」聽落都真係好甘下。

亦有巴打話自己想入電視台做，佢咁建議：「可以上大台網搵請唔請人，乜都唔識冇所謂，最重要係你畀心機學，唔好扮叻，唔識就問，好多都好好人，肯教。」亦有喺大台做嘅巴打留言：「其實大台後生仔流失去真係超高，個公司文化真係差到一個點，唔當幕後員工係員工咁，有志氣嘅都一定走。」

點擊重溫《香港01》為馮盈盈影嘅靚相：