【飛虎之潛行極戰】吳岱融黑星殺人唯唯目測知心跳　每集都有Bug

無綫熱播的《飛虎之潛行極戰》，再一次用飛虎隊和黑警為題材，而且演員陣容亦唔講得笑，有黃宗澤、吳卓羲、苗僑偉、吳岱融，而梁烈唯仿如《蝙蝠俠》小丑般的大反派，也讓人眼前一亮。不過演員強大，仍然改不掉劇集無限Bug的慣性問題，短短播了幾集，已經出現不少突兀又不合理的地方，老實講今時今日的觀眾水準，只能講句唔收貨。

還記得《飛虎II》的結局，那個經典的鬧鐘款式的計時炸彈，大班飛虎隊員衝入去撳粒掣已經搞掂，俾觀眾笑足幾年。來到《飛虎之潛行極戰》，首集用來炸掉金紫荊廣場的計時炸彈，夠鐘自然會爆，但劇情又畫蛇添足，要幕後黑手用手機遙控引爆，完全唔知想點。另一幕黃宗澤進行拯救人質訓練，見到黃宗澤相當英勇，一支曲尺手槍，可以連環開槍不用換彈匣，在同一畫面純目測都已經開足15、6槍，咁神奇的重火力，可以加入《復仇者聯盟》。

相關文章：

【飛虎之潛行極戰】最有飛虎隊神態的五大男神　有一位你實估唔到​

【飛虎之潛行極戰】梁烈唯演反派搶晒鏡　內地網民由戲裡讚到戲外

去到第三集，陳山聰飾演的阿賢，被唯唯識穿是臥底，這個時候當然是執行家法，但唯唯又開始玩嘢，除了劃花山聰塊面，之後用鐵鏈凌空吊起山聰，再玩BBQ，搞咁多大龍鳳只係俾時間飛虎出動，當然例牌有飛虎趕到，今次仲係張兆輝。之後他會點樣救人呢？筆者雖然不是槍械專家，都知張兆輝用的槍火力甚猛，但他對住山聰猛射，卻只射斷鎖鏈，而山聰卻毫髮無傷，確是一等一的神槍手，之後黃宗澤等隊員趕到，但在火海之中，神奇地出現石油氣罐，跟住一下大爆炸，眾人已經逃出生天，究竟火海與石油氣罐的配合，如何可以炸穿牆，無交代！

明知山聰係臥底，但無即刻槍殺，改為慢火燒烤，但俾飛虎救走之後，唯唯又要冒險去醫院殺山聰，既然山聰咁重要，警方又無派人保護，甚至開門俾唯唯的人，就是張兆輝自己，高智能罪犯無端變了低能，但警方亦配合地智力下降，山聰無可避免地被殺死。來到第4集，吳岱融被唯唯揭發有好多黑歷史，仲迫他合作做黑警，而中間人就係另一名黑警郭政鴻，此時唯唯又再使用高科技，只用投射螢幕跟吳岱融見面，唯唯今次厲害呀，純目測都知吳岱融心跳維持在63下，究竟他點解會知？不解釋。之後劇情發展，吳岱融以郭政鴻係黑警的理由而將他射殺，但睇真點他是用黑星手槍，點睇都是非法槍械，但仍然無人過問，短短幾集已經留下無數問號，繼續保持是是旦旦的特色。