日本殿堂級歌手西城秀樹病逝 視梅艷芳為親妹曾同台演出
撰文：洪曉璇
出版：更新：
日本殿堂級歌手西城秀樹喺16號下晝，因為急性心臟衰竭，於橫濱市內醫院病逝，終年63歲。西城秀樹原名木本龍熊，1955年4月13日出生。17歲時以一曲《戀する季節》一炮而紅，《YOUNG MAN(YMCA)》更風靡日本及亞洲各地。於日本歌壇中，同佢出道時間及年齡相近嘅鄉裕美和野口五郎並稱「新御三家」。
西城秀樹嘅歌曲同日本傳統演歌唔同，充滿青春氣息，1974年一曲《傷だらけのローラ》獲得當年日本唱片大獎歌唱獎。同年只有19歲嘅西城秀樹更首次參加紅白歌大賽。1979年推出的翻唱單曲《YOUNG MAN（YMCA）》創下銷售140萬張的紀錄，呢首歌至今仍被廣為傳唱。西城秀樹當年喺香港亦大受歡迎，梅艷芳更係佢嘅歌迷會副會長，二人相識多年，西城視阿梅為親妹妹一樣，二人曾經喺日本舉行嘅「亞洲青年音樂會」上同台演出。
近年西城秀樹健康情況每況愈下，2003年及2011年曾兩度中風導致行動不便，但佢並無放棄最愛嘅歌唱事業。4月13號剛度過63歲生日嘅西城，去到靜岡嘅戶外音樂會擔任嘉賓，更宣布年底會慶祝出道45周年，推出歷年於NHK電視台音樂節目及《紅白歌唱大賽》演出片段嘅合集DVD，可惜佢已無法親身見証作品。