【普通話有限公司】MC Jin將任《中國新說唱》導師：繫個挑戰！
撰文：賴家杰
出版：更新：
歐陽靖今午為奇妙電視節目《天下第一Friend 2》錄影，到底有冇準備節目上大爆秘密？MC Jin：「大爆呢樣嘢我覺得自然就最好，其實好話唔好聽，其實系要睇個節目同埋個主持人。」今日節目錄影完之後，MC Jin就要返美國陪伴家人，因為佢平時工作都要飛嚟飛去，所以MC Jin就話依家其實都系用Facetime去維繫同兒子之間嘅感情：「真繫好佩服上一代或者上上一代嘅人，因為以前嘅人系靠書信形式嚟聯繫，有時仲要等幾日先收到，所以真系覺得佢哋好厲害。」
節目錄影時，主持人鄭紹康安排咗生日蛋糕送畀MC Jin，因為6月4號就係佢嘅生日，而佢個仔就早佢3日，亦即系6月1日生日，唔怪得要趕返去美國啦！MC Jin話，今年生日正日都會同個仔一齊慶祝，轉眼間，佢個仔已經就快6歲，MC Jin直言自己都唔後生喇：「你唔好話佢咁快大個啦，我唔經唔覺都已經30+6啦，好快又就到40歲，我都系咁同人講我就快40歲，完全唔介意人哋講我年紀。」除了年紀轉變，身份上都有另一個轉變，就係成為《中國新說唱》導師，但大家都知道，MC Jin嘅普通話水平就真系普通過普通，MC Jin都承認自己系「有限公司」：「講普通話真系一個挑戰，但其實能夠成為導師系開心事，可以將Rap傳承落去，我都會自己有限普通話講落去。」
