【食雞案】拉扯三年　無綫律師咁樣講：電視台有權製作低品味節目

唔理好雞定壞雞，食到雞就係好雞，不過通訊局就唔係咁諗。話說喺2015年《萬千星輝頒獎典禮》入面，無綫安排一眾藝人食連鎖炸雞店嘅炸雞，遭通訊事務管理局指間接宣傳兼違反《廣播條例》守則，罰款港幣15萬。事後無綫為此提出司法覆核，案件於今天（5月16日）在高等法院開審。

代表無綫的資深大律師麥高義指出，通訊局並冇釐清植入式廣告嘅準則，而同年無綫喺另一節目內亦有薄餅送外賣嘅情節，亦有藝員喺鏡頭面前用餐，最後都裁定並冇違例。

麥高義強調免費電視靠廣告作為收入來源支撐製作新聞及其他節目，換言之，呢個裁決長遠會影響電視台嘅運作同節目質素。雖然食炸雞一事無綫收到13宗投訴，麥高義承認植入式廣告有可能會令人感到煩擾，但通訊局都唔可以因此而侵犯免費電視牌照持有人嘅言論自由。

另外，麥高義提到今次嘅爭論點唔單止為咗無綫嘅生存空間，對於通訊局指加插不必要嘅宣傳內容侵犯觀眾嘅消費權益，同時干預到觀賞趣味係違反《廣播條例》。

麥高義反駁咁樣通訊局係干預咗言論自由，亦指持牌電視台有權製作低品味嘅節目，但係低品味呢樣嘢根本就好難去定出指標同規管。