【母親節】林夏薇細個畀媽咪追住嚟打　「而家佢會捱夜等我收工」

母親節的最佳節目當然是陪母親飲茶食飯啦，不過為人子女的並非個個在呢日都有假期，林夏薇今個母親節就要開工陪不到媽咪喇。她說：「以往都會同媽咪食飯慶祝，今年要開工，同埋媽媽唔喺香港，但我已經準備好禮物送畀佢。」問到她小時候有否被媽咪寵到好似公主咁，薇薇說：「媽媽當然好錫我，不過就唔會當我係公主咁嘅，會對我獎罰分明。人愈大覺得媽咪好偉大，養育一個小朋友成人真係要用好多精力同愛心，我都想可以陪多啲媽咪，好珍惜同媽咪一齊嘅時間。」

薇薇講到媽咪對她獎罰分明，咁她又有否試過被媽咪打呢？她說：「有㗎，我細個唔聽話時，媽咪會打我手同打我pat pat，追住我嚟打㗎，佢用手打我，都試過用衣架，因為我跑得好快，媽咪隻手唔夠長就會用衣架先打到我。我屋企家教好嚴，唔畀出夜街，限住幾點要返到屋企，有門禁。」雖然被媽咪打，不過薇薇卻認為教導小朋友，適當的教訓是需要的：「其實有邊個父母會想打自己仔女，打落去都會心痛，佢哋只係想為仔女好。我覺得媽咪打得啱，打完我先會入腦，記得自己錯咩唔好再犯。」

至於媽咪做過甚麼令她很感動的事，薇薇說：「自己做藝人開工時間唔穩定，好多時拍劇拍到半夜三更先收工，凌晨4、5點返到屋企，媽咪都等我門，仲燉定啲燕窩補品畀我食，佢會留字條畀我，我一邊睇一邊喊，覺得好感動。我叫佢瞓先唔好等我，佢話佢有瞓，但我知佢其實無瞓覺。」這些窩心的舉動完全令薇薇感受到媽咪對她那份無私的愛。