【爛鬼Cult噏】余允抗豹隱30年首談《山狗》：我逼到蛇佬癲咗！

早排睇香港電影金像獎真係睇得好開心，見到古天樂奪得影帝固然興奮，但最令我熱血沸騰嘅係睇到一班新浪潮導演上台做「最佳電影」嘅頒獎嘉賓，當中仲有做咗上市公司主席唔拍戲嘅《山狗》、《凶榜》導演余允抗。嗰一刻我就喺度諗，如果我可以做到余允抗嘅專訪就真係正喇，結果過咗一排，我阿頭就打嚟話我真係等到呢個機會，仲畀咗余生個電話我，呢下真係好多謝搭路嘅岑建勳先生。

cult片王《山狗》虐殺輪姦超變態　鄭則仕仍然心寒：覺得導演痴線

【爛鬼Cult噏】余允抗收山作《凶貓》唔合格？　恐怖位照樣嚇破膽

【凶榜】最嚇人港產鬼片　角色死狀恐怖　七孔流血狗骨啃死樣樣齊

本身食緊飯嘅我就停哂手腳打畀余允抗，而余生亦二話不說咁話好快就畀個期我：「呢個專訪我一定同你做。」聽到呢度真係成個身震哂，咦，咩事，我明明係麻麻哋Cult片喎……唔理喇，總之我就喺一個星期六嘅朝早同余生傾咗次偈，而呢次偈可能我到老咗都會記得住。其實未見余生真人之前，我以為佢係好嚴肅唔識笑嘅人，好可能係因為佢之前金像獎喺台上只係講得一兩句嘢，又可能係佢嘅恐怖片影響咗我，但傾咗兩句就發現余生講嘢不徐不疾，甚至可以話係溫文爾雅，有時又會哈哈笑，唔似我腦海中嘅恐怖大王形象。

80年代活躍於影壇嘅余允抗，先後拍咗7套電影，當中《山狗》、《凶榜》同《凶貓》都可以話係佢嘅恐怖Cult片傑作，好多人都會覺得個人夠變態或者經歷過啲變態嘢先會創作到同類嘅嘢，之前訪問鄭則仕（Kent哥）時，佢都好直接咁話余生真係痴線，咁到底其實余允抗覺唔覺得自己係變態佬呢，余生就咁講嘅：「我唔覺得自己係變態，其實好簡單，好似《山狗》咁，你將自己代入落個故事裡面，當你同一班朋友去偏遠山區玩，嗰班Animal強姦完其中一個女仔後再要追殺你，你投訴無門唯一樣嘢就係反抗。拍恐怖片時，你拍到觀眾有一種Inside Fear，睇到佢哋老虎蟹都唔會去呢啲地方，要觀眾驚到承受唔到，有心理影響，咁先算係成功。」

聽得好興奮嘅我就開始講自己睇《山狗》最深刻嘅係莊靜而被輪姦一幕，以及蛇佬關鑑銘畀人倒吊兼塞蛇入褲浪一幕，余允抗聽完我講後就話：「其實我好驚蛇，但成套戲大大話話有幾百條蛇，同埋我覺得普普通通咁懲罰呢個人唔夠過癮，應該要罰得勁啲，所以放哂啲蛇落佢褲浪度。（其實係活生生定死蛇？）生架，不過草蛇嚟，咬唔死人，其實蛇佬本身係Art Director嚟，佢又唔怕蛇，所以就有呢一幕戲出咗嚟。」然後我話如果我係蛇佬，我應該畀佢逼到Short咗，余允抗即刻就話自己真係逼到蛇佬癲咗：「佢打開水缸搵刀插蛇嗰場戲，我嗌咗三聲Cut，佢都仲起勢咁插，我哋冇人敢行埋去叫停佢，好驚佢真係搵刀拮你一嘢。」

雖然《師爸》同《山狗》都係一樣喺1980年上映，但風格好唔同，我好直接咁講《師爸》依家睇真係幾Out，《山狗》就好劃時代，余允抗亦覺得《山狗》比起《師爸》成熟好多：「因為《山狗》件事好Fully Control，大部分都係新演員，基本上你叫佢做咩都得，又容易度期，當時最出名都係莊靜而同艾迪。」咁成個過程最辛苦係咩？余生就話最辛苦係拍攝地點好偏遠：「有烏蛟騰、屯門藍地水塘同埋大埔鳳園再行入兩個鐘路程嘅郊區，你知拍戲一到兩三點就萬歲，劇務一聽到呢兩個字就會暈，因為要行成兩個幾鐘出去，然後托住啲汽水、三文治行多兩個幾鐘返入嚟。講就咁講，我自己其實唔覺得拍戲係辛苦，因為有對電影嘅熱情。」之後我哋都有講到點解余生會唔拍戲轉戰商場，亦都有講到佢最鍾意自己邊套戲，仲講埋佢點睇依家香港電影，如果想睇嘅話就要繼續留意《爛鬼Cult噏》喇。