馬浚偉透露舞台劇準備就緒　驚爆曾經因為壓力大而喺街邊爆喊

馬浚偉今日西裝骨骨出席活動，為「第10屆香港小劇場獎」擔任頒獎嘉賓，見到一班後生演員攞獎，馬仔都好替他們高興。呢幾年將重心放在舞台劇上的馬仔，直言要籌劃一套舞台劇其實並非想象中咁簡單，場地、資金、演員等等問題都要自己解決，真是有苦自己知。同時，馬仔都希望政府或者大機構等可以俾多些資源去支持劇場。

由馬仔自編自導自演的舞台劇《偶遇·徐志摩》將於下個月演出，馬仔透露現在一切準備就緒，等胡定欣回港之後，整套戲就會順著排練，雖然定欣一直在內地拍劇，不過馬仔都會不時同對方交流：「就算定欣去咗橫店拍戲，定期我哋每個禮拜都起碼有幾次會通短訊，咁佢會update我嗰情況，我又會update佢我哋而家做到啲乜嘢，咁所以變咗佢好清楚香港拍成點嘅。」但馬仔就說定欣自己好緊張，不過他就完全不擔心對方的表演。

前年第一次做舞台劇，馬仔曾經壓力大到去街邊爆喊，經過兩三年的經驗累積，馬仔今次反而覺得開心多過壓力，大讚台前幕後每一位工作人員專業。馬仔指舞台劇和電視劇的戲劇理念是一致的，只不過表達和呈現的方式不同，而馬仔都會同團隊討論這兩者的分別：「就算John哥都會問『其實舞台我哋唔同嘅喎，我哋演繹方式。』大家都會一齊去討論，到底我哋應該攞一個咩嘅力度，攞一個點樣嘅表演方式。」馬仔聲稱對今次的演出信心十足，因為排練過程好順利不得止，門票都賣得好好，馬仔亦呼籲大家多多支持，說不定還會加場添。

由馬仔主演的《宮心計2深宮計》即將播出，一邊要忙舞台劇的演出，一邊又要宣傳劇集，馬仔都直言兩邊撞了好多期：「我盡量協調囉，因為小青姐都同我講有啲期我哋一定要宣傳，咁我就同我經理人佢哋講睇下點樣盡量去配合，令到兩邊都做到啦。」馬仔坦言兩邊都是自己的心血，所以都會盡力兼顧。