【開心速遞】潮偉同尚善終於再見面　為冧女不惜傾家蕩產

無綫處境劇《愛‧回家之開心速遞》昨晚播出的一集，終於講潮偉 (袁文傑飾) 同熊尚善 (滕麗名飾) 再次見面，究竟兩人的感情線會點發展呢？昨晚劇情講到潮偉為了不想讓尚善想起已逝世的愛人金城武，避免觸到她的痛處，而決定停拍由尚善寫劇本的電影《校園三缺一》，結果搞到畀負責投資該電影的大老闆曹總 (劉一飛飾) 嬲爆質問，仲話要告到他賠償一億元。不過潮偉寧願傾家蕩產都要堅決要停拍，對尚善情深至極。

而昨晚有一幕就是講潮偉發脾氣打傷了曹總之後，到醫院探望對方，期間曹總的手提電話機響起，原來是尚善打來。曹總同尚善傾完之後將電話遞給潮偉，到潮偉講，當close up影住他講電話時，一睇就發現部電話原來調轉咗㗎，正常聽電話時個相機鏡頭係向上的，但潮偉用的時候卻向下。睇返之前潮偉從曹總手上接過部電話準備拎起來聽那一幕，原來部電話係無調轉㗎，係close up的時候先出事。

袁文傑在呢集播出後接受電話訪問時表示：「呢埸戲都take咗幾次，當時太投入個角色度，同埋我睇部電話個芒係正常方向，不過其實個芒都可以調轉方向，所以無為意到原來部電話係調轉咗。」仲笑言可以考下觀眾搵錯處的眼力。呢集除了有這個蝦碌鏡頭，都有不少笑位，有一幕講潮偉sell部新戲片花給投資者，部戲個名竟然叫做《當夏枯草煲到水乾時》。另外有一幕就講潮偉為了在戲中加插飲品植入式廣告，竟然叫班喪屍開雪櫃拎嘢飲。