【棟仁的時光】輝哥為愛妻減肥38磅　原來靠呢隻超平自製食療

韓劇《經常請我吃飯的漂亮姐姐》之所以令女fans不停追看，除了因為男主角丁海寅靚仔外，最重要是那些浪漫情節，現實難以擁有，男主角圍住女主角踩單車，想拖妳手又不敢、雨中漫步等，但原來韓式情節不單只在劇集發生，更出現在67歲的煒烈身上。

5年前的烈哥體重高達210磅，在朋友生日會上，他走到心儀已久的女人面前，鼓起勇氣對她說：「我想追求妳」
女方感到很榮幸：「得，你減２０磅啦」

烈哥雖然有點醉，但聽到亦呆了一下，知道減肥相當辛苦，

他說：「如果我減３０磅？」

女方以為他說笑，回他：「咁我嫁俾你。」
大部份人聽了應該笑笑便算，但烈哥聽了後，即在幾十人面前大聲宣佈：「我要減肥！」

這是《棟仁的時光》劇中輝哥（煒烈飾）與太太的愛情故事......

劇中的輝哥是一個老油條救護員，但現實中的煒烈（藝名），人如其名，性格剛烈，尤其後生時，澳門賽車常客，在葡國杯拿過亞軍，拍劇時唔要替身、揸電單飛落河，亦試過衝入房鬧亞視大老闆，做親都係爆嘢，離開亞視後，輾轉做了建築生意，因經常和老闆出外應酬，身型亦因此而「吹漲」了，他坦言性格亦「收哂火」，想不到62歲又要做單「轟烈」事，他接受《香港０１》訪問時說：「我嗰陣肥到好似劉鍚賢咁呀...太肥喇，咩病都出哂嚟；我太太好斯文，其實見過幾次，我留意咗佢好耐，嗰次因為飲大咗，就發生咁嘅事，我第日都有問老友黃樹棠，『我尋晚真係咁講咩？』佢話係呀，你當住幾十人面前咁講㗎，我話死喇，我即刻四出打電話俾朋友問有咩減肥方法，男人講過嘅嘢要算數，何況咁多人聽到。」烈哥就開始了他的地獄式減肥。

【棟仁的時光】年輕輝哥原來係賽車高手 奪87年葡國杯房車賽亞軍

「我食薏米紅豆，口渴就當湯飲，肚餓就攞渣嚟食，唔食飯，唔食宵夜，真係好辛苦，日日食真係好悶，我加埋運動，當時我２１０磅，跑兩分鐘已氣喘，成頭大汗，我仲買埋嗰磅，日日企上去，頭兩星期減咗一兩磅，個心好淡，但啲老友叫我繼續唔好斷，到第三個星期，我開始發覺條褲鬆鬆地喎，隻手擺到入去喎，再企上磅唔見６、７磅，有成績我再加把勁，原本朝早跑一次，下晏再跑多次，開始跑到十幾分鐘.....」如果是同劇演員袁偉豪、林子善做這些不足為奇，但烈哥年紀是60開外。

三個月幾月無啖好食，烈哥激減了３８磅，這段期間他閉關減肥，亦沒有見過她，更加沒有在社交網絡「鋪相」刷存在感，只是默默地減肥，烈哥一直強調：「因為我喺好多人面前話減肥，咁做男人，講得出就要做得到。」咀巴很硬沒有說過是為了她，但其實當時那幾十人根本不重要，最重要是向她許下過承諾。

接近100天的減肥，烈哥買了不少新衫，肥佬褲亦掉了，是時候出關，剛好另一個朋友又攪生日飯局，烈哥再有機會見他的女神，他說：「當時我老友黃樹棠（前亞視藝員）同我老婆（當時還未發展）揸車嚟屋企接我，佢哋離遠見到我都好奇怪，究竟呢個係咪煒烈呢？瘦咗咁多？直到我上咗車，黃樹棠即刻問我係咪有事？佢驚我重病，我話我不知幾正常，跟住佢話：『你為咗佢減肥？』係呀，上到車我坐佢隔離，我問：『我可以有妳電話嗎？』佢答咩呀？唔記得囉，只係喺到笑囉，之後都係嗰啲啦，咁因爲我應承咗咁多人痳。」烈哥兩年前與太太結婚，亦因為太太的鼓勵，他重回幕前，現時他是無綫最搶手的綠葉，兩年拍了16套劇。

【棟仁的時光】TVB唔夠實力派甘草 揾67歲煒烈救亡：做到未停過