莊思敏自嘲中學時期粗魯又樣衰　作為運動健將多女追

昨日盤點了十位 TVB 現役女星的學生相，意外發現學生時期的莊思敏(Jacquelin)，當時不施脂粉的她更顯清秀，得到一眾同事肯定，我哋特地搵當事人回應兩句，現正身處杜拜的莊思敏一聽到學生相又被掘出，竟然表現得相當無奈，佢直言：「我覺得學生時期嘅我好醜樣。」

Jacquelin形容中學時期嘅佢，係一個蓄短髮同箍牙嘅女仔，「當時亦完全唔貪靚，由於覺得當時嘅自己一啲都唔靚，所以好介意中學同學喺Facebook tag 我啲舊相。」

身高1米76嘅Jacquelin早年以模特兒身份出道，中學時期係一名運動健將，玩好多運動，包括打籃球、跑步、跳高、推鉛球，由於佢就讀香港真光中學，如果留長頭髮就要紮孖辮，所以為咗方便運動，中二時就開始剪短頭髮。短頭髮加上係運動猛將，齋聽都覺得佢中學時期應該好型，唔難想像佢中學時期應該好多人追，「我中學係讀女校，好少接觸男仔，所以追我嗰啲都係女仔。」

Jacquelin仲話自己讀書嗰時好粗魯：「因為係讀女校，平時學校全部都係女仔，所以唔會好著重儀態，尤其真光校服係旗袍，平時帶活動或者跑起嚟唔方便，我成日稱起條裙就跑，裡面著晒打底褲。」估唔到依家成日Full gear 現身嘅Jacquelin，原來喺中學時期咁不拘小節！