Rihanna推出性感內衣品牌　親自演繹超性感造型照

依家做歌手唔止係唱歌咁簡單，好多唔同品牌都會同明星合作推出聯乘系列。不過一向走在潮流尖端嘅Rihanna特別行得比人前，之前佢推出咗化妝品牌Fenty Beauty之後，最近就喺社交平台宣布會推出性感內衣系列Savage X Fenty，仲上載多張自己著住品牌內衣嘅性感造型照。

今日Rihanna再上載一張著住黑色喱士束衣配襪帶嘅全身照，都幾性感吓，更吸引到大批女粉絲留言話一定要買返套。其實今次Rihanna都係貫徹美學，加上今次嘅理念就係鼓勵女性擁抱自己嘅身體，所以特別搵到唔同膚色同size嘅女model拍攝宣傳照，希望所有唔同身形嘅女性都可以駕馭到品牌內衣，而成個系列會於5月11日公開發售。