仙樂都鋒芒不及內地網紅羅云琦：我要盡地主之誼
2018年俄羅斯世界盃分組賽將於6月14日正式開始。為隆重其事，有網台請來兩岸三地甚至足球王國巴西的美女參與有關節目的拍攝，其中香港代表仙樂都（吳堯堯）於昨日（5月2日）的記者會上，鋒芒不及一眾外地佳麗，而會上為事業搏到最盡的要數羅云琦、宋艾珊。
對於被搶鏡，甚至有佳麗一直爭咪說話，作為本土代表都要靠邊站的仙樂都表示毫不介意，還說：「佢哋青春無懼吖嘛，而且佢哋有時聽唔明廣東話，我都會以有限的國語、英文去協助佢哋，要盡地主之誼。」果然見慣大場面，有風範。
當記者會進行至節目簽約儀式時，仙樂都遲遲未能下筆，很仔細地閱讀有關條款，因此被取笑「係咪驚有條款話拍攝期間唔結得婚、唔生得仔？」仙樂都還因而自爆：「都無人同我生仔。」如此外形竟沒拖拍，竟沒狂蜂接近，大家信嗎？她解釋其實有追求者的，不過……
「唔係無拖拍，有時都拍咗啲好短時間嘅拖，但感情都未成熟就無再一齊，所以咪無講俾人聽囉。之後都有啲追求者，但我都唔知啲男仔諗乜，我覺得佢哋搵我嚟攝時間囉。我呢個年紀可能識啲年紀大個少少，四十幾五十，佢哋已經結過婚離埋婚又有小朋友，但都好似長唔大咁樣，幾十歲人反而好似想我湊返佢轉頭，所以覺得唔係好啱。」對於這種有過婚姻的追求者，仙樂都指只會當朋友看待，就算對方一直傳短訊，也只會任由他存在，不置可否，畢竟自己一直忙於工作，新歌《別人的幸福》亦剛派台，而待感冒痊癒後便會繼續為另一新歌《美麗約定》進行錄製。
仙樂都一直以來都很努力出品屬於自己的歌，是為北上登台作準備？她說：「都唔係嘅，不過內地市場差咗，我已經3個月無登台，係今個月先有返登台工作，可惜啲價又跌咗。」
有3、4年內地登台經驗的她，理應賺了不少人仔可用於投資磚頭，但她沒有這樣做，因為：「啲錢左手嚟右手去，好似2、3月新年嗰段時間我真係無嘢做，所以我係有嘢做就要做晒佢儲定啲錢，無嘢做嗰時就拎返啲錢出嚟用，好天斬埋落雨柴，同埋我一直都鍾意唱歌，用咗啲錢去追夢、去錄自己嘅歌。」為追夢放棄磚頭，一個字：「傻」，但難道不值得敬佩？