鄭中基力撐廣東話係母語　叫教育局局長辭職：你唔好問個西人？

早排教育局就Upload咗一篇中大學者嘅宋欣橋嘅文章，內容就主要係話「粵語不是母語」，引來社會廣泛討論，其中以前喺中大任教過嘅歐陽偉豪（Ben Sir）就極力反對呢種講法，仲話教育局背後嘅動機一係矮化粵語，一係就壓抑粵語。身為人父嘅鄭中基（Ronald）覺得「粵語不是母語」呢種諗法好唔妥，仲喺facebook出Post，叫教育局局長楊潤雄辭職：「你細個阿媽點教你講說話？你依家係點樣諗嘢？用咩語言邏輯？點解連母語係咩都要問人？仲要問個講國語嘅人，你唔好問個西人？你點樣做教育局長？你辭職啦！」而以前喺TVB教普通話嘅利嘉兒都話粵語先係香港人嘅母語：「雖然學普通話係一個全球大趨勢，我亦贊成小朋友學多一種語言傍身；但我以後個小朋友一定要識粵語，因為粤語係我哋嘅母語！」至於邵仲衡亦將自己嘅facebook頭像加上「廣東話係我母語」嘅字眼，唔知大家又有咩睇法？