【開心速遞】金城安見到曱甴驚到要譚育英保護　麻甩女朋友都好正

唔少男仔都會想要一個溫柔嬌嗲、小鳥依人的女朋友，打扮女性化最好着下裙同高踭鞋。昨晚無綫播出的《愛‧回家之開心速遞》就講金城安 (周嘉洛飾) 同朱凌凌 (吳偉豪) 有兩個同學帶埋女朋友，跟他們一起打邊爐，兩位阿嫂的性格都嗲聲嗲氣，其中一個連開支樽裝飲品都無力，要男朋友幫手。作為男朋友的當然好受落啦，不過安仔同朱凌凌就覺得呢種女仔好作狀喇。而安仔女朋友譚育英 (林凱恩飾) 就好唔同，性格好麻甩，即係男仔頭，性格豪邁爽直不拘小節，衣著打扮多數都係T恤、恤衫襯牛仔褲仲要長褲，有時啲言行甚至Man過安仔。

雖然安仔並唔介意女朋友育英咁麻甩，但其實心底裡都渴望育英可以表現同打扮得女仔些，例如着下裙，所以他叫好友Venus (鄺潔楹飾) 陪育英去買裙，希望改變一下女友的造型。安仔又幻想可以保護女友，展現出自己Man爆的一面，在女友前面可以似返個男人。不過事實卻是，當遇到曱甴時，安仔好驚而要由連曱甴都唔驚的育英保護返轉頭。

作為男仔的你，又會唔會想要一個好似育英咁樣的麻甩女朋友？定還是鍾情嬌嗲型的女友多些呢？作為女仔，又會覺得女性化的形象吸引異性多些，抑或是爽朗男仔頭性格先更得男仔歡心呢？但要記住無論咩類型的女朋友，都一定鍾意男朋友氹的，睇安仔送花畀育英有幾冧就知道啦。