何君誠男二淪落變大茄　又一無綫親生仔離巢：可能係好事嚟

大家仲記唔記得無綫處境劇《愛‧回家》入面的方嘉尚 Billy (何君誠飾) 呢個角色？何君誠 (Quinn) 自2008年參選完香港先生加入TVB多年，拍過多套劇集做過多個角色，但戲份最多兼令人印象最深刻的就是Billy呢個角色。當時的Quinn備受公司力捧，觀眾同網民都以為他會有機會上位，亦都期待他之後的劇集角色會有更多的發揮。可惜唔知咩原因，Quinn之後演出的都是配角。日前就有消息指Quinn已經正式約滿TVB，不再留在大台發展。

對於約滿離巢一事，Quinn接受電話訪問時直認不諱說：「係呀，我同TVB兩日前完咗合約喇。」他透露與TVB剛完的是經理人合約，換言之他曾是大台親生仔，到底是甚麼原因令他萌生去意，不再續約呢？Quinn說：「都同公司傾過，我想試下新環境，出去發展下，想試下內地嘅市場。一直都有人問我返唔返大陸發展，但喺TVB太忙，好難抽到時間去接內地嘅嘢拍，咁啱依家完咗約，可以開始去大陸發展。」他月中就會到北京見製作團隊和電影公司：「喺內地發展係我嘅大方向，未知以咩模式，要傾合作方式先知。」

至於在TVB將近10年時間，由曾獲力捧做男二後來卻變大茄，可有因此而感到心灰意冷？Quinn表示：「TVB係少林寺嚟，我喺TVB好得到好多機會同經驗，但呢兩年自己無咩大發展空間，無咩好作品，可能已經麻木咗。喺一個環境做得耐，都想試下新模式，新文化、新事物，對我嚟講係刺激嘅，會有新衝擊。」他笑言自己都想知為甚麼在TVB的發展會突然停滯不前：「呢個地方可能無我發展嘅空間啦，不過可能係件好事呢，放我出去可能會有更好嘅發展。他強調同TVB的關係仍然好好，如果將來有機會也會再跟TVB合作：「作為演員，邊度有好嘅機會就去邊。TVB係一個開始，好多演員都係TVB出身再向外闖，睇你肯唔肯踏出呢步，人係要成長嘅。」