杜汶澤揚威意大利影展　大晒流利英文

一提到香港藝人講英文，大家應該記得連詩雅嘅「Rest in pieces」同埋鄧麗欣嘅「I am very thanks them」，不過香港都有唔少藝人英文都好好，但係原來除咗謝安琪、陳奕迅、謝霆鋒、陳法拉等，杜汶澤都講得一口流利英文！

話說阿澤日前就飛咗去意大利出席烏甸尼「第20屆遠東電影節」，由阿澤執導嘅《空手道》喺影展期間舉行歐洲首映禮，更榮獲「網上票選最喜愛電影獎」，而阿澤就喺台上以流利英語發言，謂：「我要感謝所有喺我生命中出現嘅人，因為，因為我相信遇到嘅每一個人或多或少都能夠啟發到我，尤其是啟發我拍呢部電影嘅人。呢部電影係關於失敗同點樣企返起身，我就經常遇到失敗，但我永遠唔會放棄，好多時候都會成功地企返起身。」

而呢番言論就獲得大批網友大讚，但係佢就喺Facebook留言寫道：「流利又未至於，不過香港人，中五程度，係咁上下啦！」不過其實由小學開始就讀拔萃男書院嘅阿澤英文應該差極都有個譜，雖然會考得4分，但英文都有個B。事實証明咗，就算公開考試成績唔理想，都唔代表冇出路，阿澤今次仲威到去意大利，只要唔好放棄真係乜都有可能發生。