【英文縮寫大解構】咩係IDGAF？　等Dua Lipa開騷唱你聽　

曾奪得MTV歐洲音樂大獎及NME最佳新人獎嘅英國歌手Dua Lipa今日﹝5月1日﹞喺麥花臣場館舉行演唱會，將多首hit爆作品包括，《New Rules》、《Scared To Be Lonely》、《IDGAF》等，帶到嚟香港同歌迷分享。首歌咁hit相信大家都有聽過，但究竟知唔知道IDGAF係咩意思呢？

有時同朋友whatsapp，講起啲激心嘢嘅時候我打「IDGAF」佢哋都會問我打乜。簡單講吓，其實「IDGAF」就係「I Don’t Give A Fxxx」嘅意思，即係「I don’t care」嘅意思。例子，當你腦細喺你放假嘅時候打畀你叫你做嘢，你又唔想理，你可以答佢「IDGAF」，如果你唔想撈嘅話。

最簡單就係成日會用到嘅「LOL」，記得有幾次我喺工作whatsapp group打咗LOL，之後我阿頭打咩都加LOL落去，我頂唔順佢講啲好認真嘅嘢都加LOL，都九唔搭八，所以就問佢究竟知唔知LOL點解，原來佢以為係「囉」嘅英文拼音。其實呢三個英文字就係代表「Laugh Out Loud」，即係好好笑咁解，以後唔好用錯喇...

可能因為有時打字打慣縮寫，冇諗到可能對方都未必get到。記得有次同老豆whatsapp，我答咗句「IDK」，佢以為我打錯字。雖然我哋成日用到，但係好多上咗年紀嘅人都唔會知道呢類型嘅英文縮寫代表啲乜，而「IDK」就係「I Don’t Know」我唔知道嘅意思。睇返張圖，除咗黑人問號之外，其實呢張圖完美演繹到I Don't Know嘅意思。

「SMH」係「Shake My Head」嘅縮寫，當有朋友做或者講埋啲令你無言嘅嘢，你就可以「SMH」佢。

最後「FML」代表「Fxxx My Life」，意思就係當你遇到好差嘅情況而喺度自我哀嘆。例子就好似當你同男朋友分手，同時冇咗份工，然後又差銀行卡數唔夠錢還min pay，呢個自怨自艾嘅時候，你就可以用「FML」，再睇返Michael Jordan喊到淚流滿面，就知道FML係有幾慘啦！